USA ka maestra sa nursery school anaa sa kustodiya sa Pardo Police Station human gireklamo og child abuse sa usa ka inahan sa iyang 4-anyos nga lalakeng tinun-an sa usa ka nursery school sa Barangay Bulacao, Siyudad sa Sugbo.
Si Police Maj. Jhon Kareen Esober, hepe sa Pardo Polce Station, niila sa maestra nga si Mae Letigio, 39, kinsa gidakop pinasikad sa citizen’s arrest kuyog ang mga pulis.
“Ang inahan sa bata maoy nagdakop sa maong maestra pinaagi sa citizen’s arrest (Huwebes sa buntag). Mao to nga nadala siya diri sa estasyon,” matod ni Escober sa Superbalita Cebu.
Ngan sa bata ug inahan gipugngan ning mantalaan base sa balaud nga nagprotehir sa kabataan.
Matod ni Escober nga base sa reklamo sa inahan sa 4 anyos, nianang Huwebes sa buntag, Pebrero 27, didto siya sud sa compound sa tunghaan. Kay 4 anyos pa, iya kining huwaton sa tunghaan hangtod mamuhi.
Matod ni Escober nga nahibung ang inahan naghilak nga nagpadung kaniya ang iyang anak. Nisumbong kini kaniya nga gikumot sa iyang maestra ang iyang nawong kay wa siya makatubag sa mga pangutana sa test paper.
“Matod pa sa bata sa inahan nga suko ang iyang maestra kay wala daw lagi ansere ang test paper ug gikumot ang nawong sa bata,” dugang ni Escober.
Ang inahan nangayo og tabang sa Pardo Police Station sa Biyernes sa buntag hinungdan ilang giadto ang tunghaan.
“Actually, duna gamay resistance kay gipugngan man sa kauban nga mga maestra kay dili pakuyogon (namo). Hangtod nga miuban ra hinuon sa mga pulis si Letigio,”dugang ni Escober.
Matod ni Escober nga ang inahan sa bata mopasaka og kaso batok sa maestra tungod kay giatiman dayon sa inahan ang pagsang-at sa kasong kalapasan sa Akta Republika 7610 kun Special Protection of Children Against Abuse, Exploitation and Discrimination Act.
Si Letigio nagdumili sa paghatag sa iyang habig dihang interbyuhon unta sa Superbalita Cebu.