GUSTO ni pound-for-pound champion Manny Pacquiao nga ipahigayon gihapon sa Dallas Cowboys Stadium ang sunod niyang away, nga gibanabanang mapahigayon sa ulahing bahin ning tuiga.
Nadasig gyud si Pacquiao nga moaway pagbalik sa bag-o, dako ug nindot kaayo nga venue dihang niabot sa 51,000 ka mga tawo ang ningtan-aw sa ilang away ni Ghanaian Joshua Clottey niadtong Marso 13.
Bisan dili kaayo tantong sikat si Clottey, napuno gihapon ni Pacquiao ang gitananang lingkuranan sa tag-iya sa $1.2 billion nga estbalisemento nga si Jerry Jones.
Ang Dallas Cowboys Stadium, nga maoy puy-anan sa sikat nga Cowboys sa National Football Leagu, makapasulod og 100,000 kapin ka mga tawo apan katunga lang ang gitagana alang sa Pacquiao-Clottey.
Ang nanan-aw sa Pacquiao-Clottey maoy ikatulong labing daghan sa kasaysayan sa boksing sunod sa Muhammad Ali-Leon Spinks rematch niadtong 1977 ug Julio Cesar Chavez-Pernell Whitaker niadtong 1993.