Cash incentives sa nat'l coaches ipanghatag na

SUGDAN na sa Philippine Sports Commission (PSC) ang pagpanghatag og cash incentives ngadto sa 182 ka national coaches nga nakaangkon og medalya sa 30th Southeast Asian Games nga gipahigayon sa Pilipinas niadtong Disyembre sa miaging tuig.

Sa kinatibuk-an, dul-an sa P45 million ang ipang-apod-apod sa PSC alang sa tiggiya sa atletang mga Pinoy.

Ubos sa Republic Act No. 10699 nga nailhan sab nga National Athletes and Coaches Benefits and Incentives Act, ang national coach nga nakadaog og gold medal sa matag duha ka mga tuig nga kompetisyon makabulsa og P150,000, ang silver medal kay P75,000 samtang ang bronze medal kay P30,000.

Ang mga nadawat sa coaches katunga sa mga nakuha sa mga atleta nga iyang naagak sa pagsakmit og medalya sa kompetisyon.

“A coach can only receive his/her incentives upon submission of required certifications and documents,” pasabot ni PSC-NSA Affairs Office Head Annie Ruiz.

Ang national coaches sa arnis, athletics, beach handball, billiards, bowling, boxing, cycling, dancesports, gymnastics, jiu-jitsu, kickboxing, modern pentathlon, muay, pencak silat, rowing, sailing, sambo, sepak takraw, soft tennis, soft tennis, softball, squash, taekwondo, tennis, weightlifting, windsurfing ug wrestling mao ang unang tapok nga makadawat sa ilang insentibo.

Mosunod nga tapok mao ang gikan sa archery, baseball, canoe, fencing, judo, lawn bowls, obstacle course, swimming, traditional boat race ug volleyball.

Ang pundo alang ning gipanghatag nga mga insentibo kinutlo gikan sa National Sports Development Fund (NSDF) nga gi-remit sa Philippine Amusement ug Gaming Corporation (PAGCOR) nga maoy nakasaad sa RA 10699. / PR

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph