MISIDLAK ang pangalan ni skateboard sensation Margielyn Arda Didal human siya napiling “Athlete of the Year” sa 37th Sportswriters Association of Cebu-San Miguel Brewery (SAC-SMB) All-Cebu Sports Awards kagahapon sa SM City-Cebu.

Ang 21 anyos nga si Didal nakaangkon sa labing taas nga pasidungog nga gikonsiderar nga ‘Oscars’ sa Cebu sports gumikan sa iyang dakong kalampusan nga naangkon sa miaging duha ka mga tuig.

Ang garbo sa Barangay Lahug, Cebu City unang nailhan niadtong Mayo, 2018 dihang nakakulit siya og kasaysayan isip labing unang skateboarder sa Pilipinas nga nakapakita og aksyon sa Street League Skateboarding pinaagi sa SLS PRO Open sa London, England.

Sa sama nga tuig, mas nabantog si Didal dihang nahimo siyang labing unang atleta nga Pinoy nga nakarepresentar sa nasod sa X Games sa Minneapolis, Minnesota.

Gihuman ni Didal ang iyang kampanya sa 2018 pinaagi sa pagtunol og gold medal sa Pilipinas sa women’s street skateboarding event sa Asian Games sa Indonesia.

Gumikan niini, nakakuha og luna si Didal sa “25 Most Influential Teens of 2018” sa Time magazine.

Nagpadayon ang paghatag og dungog ni Didal sa Pilpinas niadtong 2019 dihang nahiluna siya sa ikalimang dapit sa Street League Skateboarding World Tour sa Los Angeles, United States.

Nakakuha siya og 21.2 sa final aron labwan ang kanhi world champion ug five-time Summer X Games gold medalist Leticia Bufoni.

Niadtong Hulyo, 2019, gipatigbabawan ni Didal ang 1st Philippine National Skateboarding Championship nga gipahigayon sa Santa Rosa, Laguna.

Gituldokan ni Didal ang iyang sugilanon sa kalampusan niadtong 2019 pinaagi sa paghatag og duha ka gold medals sa 30th Southeast Asian (SEA) Games nga gipahigayon dinhi sa nasod.

“Nagpasalamat mi sa maong award. Dili ra ni para kang Margie o para ra namo. Para ni sa tanan. Hinaot pud nga ang ubang mga ginikanan ug mga kabatan-onan bisan sa kawad-on maningkamot lang gyud. Dili lang mawad-an og paglaom. Suportahan nato ang atong mga anak para makab-ot pud nila ang ilang mga damgo,” matod ni Julie Didal, inahan ni Margielyn.

Ang mga ginikanan ni Didal mao ang midawat sa iyang prehistiyusong pasidungog gumikan kay kasamtangang naa siya sa Amerika aron mosalmot sa Tampa Pro event isip titpik sa iyang hugot nga preparasyon alang sa World ug Lima Open sa Brazil nga usa ka Olympic qualifier.

Si Didal adunay dakong poruhan nga maka-qualify sa 2020 Tokyo Olympics. Kasamtangan siyang naa sa no. 13 sa women’s world street skateboarding rankings unya 20 ka skateboarders ang hatagan og luna alang sa matag upat ka mga tuig nga kompetisyon.

“Dahil sa achievements ni Margie, nagkakaroon din ng awareness ang buong bansa that skateboarding is the sport for Filipinos and the biggest contributor of it is from the province of Cebu,” batbat ni Skateboarding and Roller Sports Association of the Philippines, Inc. (SRAPI) past president Monty Mendegoria. / Pooled Report