BATA pa lang si Zoe Denise Itumay nabutang na sa peligro ang iyang kinabuhi.
Walo pa lang siya ka adlaw natawo, gioperahan na siya sa Chong Hua Hospital sa siyudad sa Mandaue tungod sa iyang kahimtang.
Pagkatawo ni Zoe niadtong Pebrero 12, 2019, siya na-diagnose sa kondisyon nga gitawag og Tracheoesophageal fistula/esophageal atresia.
Sumala ni Leah, inahan ni Zoe, ang esophagus sa iyang anak kay wala masumpay sa tiyan niini.
“So, dili siya maka-feed through (the) mouth,” matod sa 32 anyos nga inahan, usa ka privacy manager.
Nagmalampuson ang operasyon sa mga doktor.
“After three hours, naka-received mi og good news from the surgeon nga successful ang operation. Nasumpay ra jud successfully,” asoy ni Leah.
Sud sa usa ka buwan ug usa ka semana, nagpabilin sa neonatal intensive care unit (Nicu) si Zoe sa wala pa hingpit makagawas sa ospital niadtong Marso 17, 2019.
Human niini, laing hagit na usab ang giatubang sa iyang mga ginikanan nga sila si Leah ug Socrates Itumay, Jr. tungod kay niabot og P1 milyon ang ilang bayranan sa ospital. Wala pay labot niini ang gasto alang sa mga tambal.
Pinaagi sa buotan nga higala ni Leah sa United States, nag-abli sila og account sa GoFundMe, diin gipaagi ang mga donasyon nga niabot og kapin o kuwang tunga sa milyon.
Ang kuwang sa bayranan sila na si Leah ug Socrates ang nagbayad uban sa tabang sa ilang mga higala ug isig ka pamilya.
Karon, okay na si Zoe ug maayo mokaon nga way pili.
Niadtong Pebrero 16, 2020, gisaulog ang labing unang birthday ni Zoe sa Waterfront Cebu City Hotel and Casino nga gitambungan og 60 ka mga tawo.
Kasingkasing ang tema sa birthday party sanglit duol kini sa adlaw sa mga kasingkasing o Pebrero 14.
“I hope and pray that Zoe grows up as a kind person. Just like how the people who helped her, showed her kindness. My message is for Zoe to grow up with a good heart,” dugang ni Leah. / SCG