Sugilanon: Ang langgam ni Luciano

Sugilanon: Ang langgam ni Luciano

By CARMELO D. LARIOSA

Panadtaran, San Fernando, Cebu


DAKo na ang langgam ni Luciano ug buotan kaayo kini kay kon iyang buhian gikan sa halwa niini, molupad dayon kini ngadto sa layong lasang, apan inigka hapon mobalik kini ug moawit diha sa sanga sa sineguylas. Mao ra kini ang makahatag og kalipay kang Luciano ning iyang pagpuyo nga nag-inusara na lang. Patay na ang iyang Nanay Orang ug Tatay Kadyo tungod sa ilang sakit. Siya ang nagpadayon sa gibiyaang uma sa iyang amahan.

Ang langgam napalgan ni Luciano didto sa utlanan sa iyang uma nga kuyabog pa. Naglukso-lukso kini kay dili pa makalupad. Iyang gidakop ug nailhan niya nga kuyabog sa alimukon, langgam nga adto ra sa lasang magpakabuhi. Karon nakita ni Luciano nga ang langgam misulod pagbalik sa halwa nga ginama sa alambre. Apan karon dunay problema si Luciano kay ang iyang langgam nagustoan ni Merlita, ang dalaga nga iyang gikaibgan ug gihigugma sa hilom. Gipangayo ni Merlita ang langgam aron dad-on sa ila ug siya nay mobuhi niini.

“Sugot ka, Ciano, nga akuon na kanang imong langgam?” ni Merlita nga tam-is kaayog pahiyom. “Nindot kaayo siyag kolor ug buotan kaayo kay mobatog ra sa imong abaga.”

Wala dayon makatingog si Luciano kay naglibog siya kon ihatag ba ang langgam kang Merlita o dili.

“Hoy, sugot ka ba nga pangayuon nako imong langgam?” miusab pagsulti si Merlita.

Miyango na lang si Luciano kay ang nangayo mao man ang binuhat nga iyang gihigugma. Apan maunsa na lang kon pasagdan ni Merlita ang iyang alimukon didto sa ilaha? Basig tukbon sa iring, peligro kaayo. Pero nakahukom siya nga iya na lang ihatag.

Mibalik ang kamingaw ni Luciano kay nag-inusara na man sab siya sa iyang payag. Wala na ang halwa ug ang alimukon nga nagbitay sa bentana. Tua na sa ilang Merlita. Wala na siyay ikasulti-sulti ug ikaduwa.

Usa ka buntag nahiigpot si Luciano sa sangpit ni Merlita. Dala sa dalaga ang halwa diin didto sa sulod ang alimukon.

“Ciano, ako na lang ning ibalik dinhi nimo, uy, kay luoy kaayo nga wa nay makalingaw nimo!” ni Merlita nga mibutang sa halwa diha sa lingkuranan nga kawayan.

“Mer... Merlita, salamat kaayo. A, kining... lingkod una kay duna koy isulti nimo,” ni Luciano.

“Unsa may isulti nimo nako, Ciano?” ni Merlita nga mitutok sa ulitawo.

“Merlita, ayaw lang tawon kasuko, ha! Gusto kong mahibalo ka nga gihigugma tika! Gimahal ko ikaw! Gusto ko nga ikauban ko ikaw dinhi sa akong payag... uban sa akong langgam nga alimukon!” Gipadayag ni Luciano ang pagbati nga dugay nang naglumlom sulod sa iyang dughan.

Sa pagka dungog ni Merlita sa mga pulong ni Luciano mipahiyom siya. Gitutokan niya ang ulitawo ug gikuptan sa kamot.

“Kining,.. Ciano, anagon na baya ang imong mga mais. Mag-anag ta. Gihidlaw na baya kog inanag nga mais!” matod ni Merlita.

“Oo. Sige, mag-anag ta!” tubag ni Luciano. Dayon iyang giablihan ang halwa ug gibuhian ang alimukon. Milupad dayon ang langgam nga wala mananghid sa duruha kansang mga pagbati bag-o lang nagkatakdo. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph