NAGSIGE na ko og hisgot dinhi sa kamahinungdanon sa sidewalk sa bisan unsa ug asa nga road network. Importante ni tungod kay ang karsada nga way sidewalk o nababagan, di maayo. Kon way kalakwan o kaatangan og sakyanan ang mga tawo, anha ni mamarog sa karsada. Kini makapahinay sa dagan sa trapiko hangtod nga maghuot ang mga sakyanan.
Obserbahi ang mga karsada nga way sidewalk, mao ni ang sagad dapit diin mohinay ang dagan sa mga sakyanan. Sama sa Gov. M. Cuenco kun Banilad-Talamban road. Wa ni sidewalk. Mohinay ang dagan sa trapiko kay ang mga tawo anha moagi sa karsada, mga PUJ manghunong aron mopasakay. Wa pa ni labot sa iyang mga intersection.
Kon sa relasyon pa, complicated ang sitwasyon sa Bantal.
Ang mga tawo, kon duna pay tarong nga sidewalk, hayan mas mopabor pa sa paglakaw. Pananglitan, kon ako taga Banilad unya ang akong trabahoan naa ra sa IT Park, nganong mosakay pa man kog PUJ nga mas dali kong moabot kon maglakaw?
Daghan sa mga tawo mas pabor nga mosakay kay mas luwas kay sa makig-ilog ka sa mga sakyanan sa dan bisan duol ra unta ang ilang lakwan.
WA PA MAUSAB
Ang mga karsadang bag-o nga gipalapdan naa man tuoy sidewalk, pero grabe usab ka gamay. Naa ra sa mga one meter. Kon magsugat ang duha ka mga tawo, magbangga o mag-abot ang mga abaga.
Hinaut pa unta nga mausab na ang mentalidad sa mga planner sa Department of Public Works and Highways (DPWH). Ang sidewalk sama ra usab ka importante sa road network. Pareho ra ni sila, it moves people. Ang nakanindot sa sidewalk kay mag encourage ni sa mga tawo nga molakaw, makapasingot.
Maayo gani kay kini nga administrasyon nakakita sa kamahinungdanon sa mga sidewalk hinungdan nga kini gihawanan. Gitinuod ang mga local government unit (LGU) pinaagi sa mando sa Department of the Interior and Local Government (DILG).
Karon nagpadayon ang paghawan sa mga sidewalk ug uban pang dunay babag nga makaapekto sa dagan sa trapiko.
EARTH HOUR
Kadtong mga nagtultol sa Earth Hour Night Ride, mahitabo ni karong Marso 28, katapusang Sabado karong buwana. Mao ni ang pahibawo sa Habagat, nag-unang tigpasiugda sa kalihukan sud na sa daghang katuigan.
Ang rota sa night ride sama ra sa miaging tuig kay maoy giaprobahan sa Cebu City Transportation Office (CCTO). Tadlasan niini ang dagkong mga karsada sama sa MJ Cuenco avenue, General Maxilom, Gorordo avenue, Escario st. ug Osmeña blvd. Duna kini gilay-on nga 10 kilometros.
Busa kadtong nagplano sa pagdala sa ilang gagmay pang mga anak, mas maayong maghuna-hunag maayo, dad-on ba o di sa ride. Alang sa mga detalye, monitor lang sa FB page sa Habagat Cebu.