DILI angayang mabalaka si Kong. Eddie Gullas nga walay mahimong kongresista sa bag-ong distrito nga iya unyang mugnaon gikan sa Primero Distrito.
Naa si Mayor Val Chiong nga nangitag laing hagit karong subra pas nakab-ot ang iyang Vision and Leadership (VAL) 2020.
Gilusad kaniadto pang unang kasaulogan sa Naga City Charter Day sa Septiyembre 5, 2007 kinig VAL 2020 ug tuod man, kada tuig, dunay mga pasilidad ug programa nga gilusad ang mayor.
Mao nga karon nga tuig 2020 na, ang Syudad sa Naga mao karon ang labing progresibong dakbayan sa habagatang Sugbo.
Niadto ko sa opisina ni Mayor Chiong sa Miyerkules aron tinuon gyud ang tinuod. Ug tuod man, seryuso ang mayor nga moluwat sa katungdanan karong Marso 16.
Apan nakumbinser ko nga wa siya mapul-i sa pagserbisyo ug kalambuan. Nagkinahanglan lang siya og laing politikanong hagit kay subra pas good ang Syudad sa Naga karon.
Inig biya niya, siguradong mapadayon ang iyang mga plano ubos kang Mayor Vanessa Kristine Chiong, ang iyang anak.
Si Kristine, nga usa ka abogada, nakapahapsay sa mga proseso diha sulod sa Naga City Hall kaniadtong na-mayor siya. Unya, nagpasiugda pa og mga planong makapadugang pa sa gipangplano sa amahan.
Pananglitan, dihang nanguli na ang mga bisita sa mayor sa miaging Merkules, gipa-sit-in mi niya sa usa ka presentation kabahin sa usa ka proposed land use plan alang sa syudad
Ang mga nag-presentar mga batan-on nga eksperto gikan sa UP. Ang maong proyekto gipasiugdahan ni Mayor Kristine. Atong malantaw nga si Mayor Kristine na sab ang mopahigayon niini inig luwat ni Mayor Val.
Dayon, ang mahimong bise mayor mao ang iyang igsuon nga si Jingjing nga maoy number one councilor sa Konseho,
Alang kanako, kini si Konsehal Jingjing Chiong subra pas hinog alang sa mas taas nga katungdanan diha sa City Hall.
Sa Konseho, naa na sab ang mga pag-umangkon ni kanhi mayor Enan Chiong.
Kay padulong na man sa pag-exit sa politika si Kong. Eddie Gullas, panahon na sab nga iyang tungaon ang Primero Distrito aron mahimong duha.
Tutukan unya inig balik sa Kongreso ni Mayor Samsam Gullas ang umaabot nga Primero Distrito nga mao ang Syudad sa Talisay ug Minglanilla. Ug hawan alang kang Val Chiong isip kongresista sa umaabot nga ikaduhang distrito nga mao ang Syudad sa Naga ngadto sa lungsod sa Sibonga.
Tuod man, nindot kaayo ang achievemen ni Kong Gullas. Iyang gimugna ang tulo ka mga syudad nga mao ang Talisay, Naga ug Carcar. Karong iyang katapusang termino, mugnaon niya ang usa ka distrito.
Kudos Kong. Gullas!
(@anol_cebu sa Twitter)