SURPRESA nga milusad og greyhound operation ang Police Regional Office 7 (PRO) sa tanang jail facilities sa Central Visayas nga gitawag nilag “Oplan Shawshang” diin daghang kontrabando ang nakuha.
Hinuon, di tanang mga bilanggoan nakuhaan og mga kontrabando.
Alas 3 sa Sabado sa kaadlawon, Pebrero 29, gisulod sa kapulisan, Bureau of Jail Management and Penology (BJMP) ug Philippine Drug Enforcement Agency (PDEA) 7 ug ang Cebu City Jail aron siksikon ang tanang selda sa sulod.
Matod ni Police Brigadier General Albert Ignatius Ferro, director sa PRO 7 nga maoy nangulo sa greyhound operation, ilang target ang illegal nga drugas human masuta nga kasagaran masakmit gikan sa sulod sa city jail ang nag facilitate.
DRUGS
Ang mga nasakmit mao ang 56 ka gagmayng pakete sa gituohang shabu, 193 ka drug paraphernalia, 17 ka syringe, usa ka weighing scale, 108 ka shabu packing paraphernalia, mga gunting, 107 ka sigarilyo, kwarta nga mobalor og P140,941, 59 ka mga alahas, 141 ka cellular phones ug 28 ka sim packs.
Nakuha usab ang LPG tanks ug gas stoves, mga kaka nga giingong maoy gamiton alang sa kaka derby sa sulod sa bilanggoan, mga can sa beer ug gatusan ka lighters.
“We will be investigating why these cash are here in the jail. We are informed that not more than P2,000 allowed in the jail per person deprived by law,” matod ni Ferro.
Si Jail Superintendent Julius Arro, warden sa Cebu City Jail, niangkon nga adunay problema ang bilanggoan ilabi na nga daghan pa gihapong kontrabando ang nakuha sa mga operatiba.
Matod niya nga ang pagkatap sa illegal nga drugas sa city jail dili lang problema sa BJMP, kon dili lakip na sa ubang ahensya sa gobyerno.
“Hindi ito panahon na mag sisihan at magtuturoan. Ang amin lang, we are lucky na nagkaroon tayo ng ganitong collaboration with the PNP and other law enforcement agencies para to address this problem,” matod ni Arro sa mga tigbalita.
Sa pangutana nganong naay LPG tanks nga nakasulod sa mga selda, matod ni Arro nga ilang gitugotan nga makagamit ang mga binilanggo sa LPG alang sa pagluto sa ilang mga pagkaon.
Sa pagkakaron giklaro ni Ferro nga wa pa silay mapasakaan og kaso tungod kay way nakuha sa posisyon sa usa ka binilanggo nga kontrabando.
Ang ilang himuon mao ang forensic examination sa mga cellular phones nga nakuha aron ma trace nila kinsa ang nagpadagan sa illegal nga drugas sa sulod sa jail nga adunay contact sa gawas.
MANDAUE
Atol sa gipahigayong region-wide nga greyhound sa mga prisohan, nakuha sa Mandaue City Jail ang mga hinagiban ug nuisance contraband.
Sigon ni Jail Warden Gil Inopia, ang kalihukan usa ka initiative sa Philippine National Police aron sa pagsumpo sa drugas sulod sa mga prisohan.
Dugang niya nga ginagmay lang ang nakuha nila nga mga hinagiban ug kasagaran niini mga nuisance contraband sama sa wire, ballpen, lansang, baraha, nail cutter, rasor blade ug kutsara. / BBT, AYB, KFD, GCM