ANG mas gipanindot nga Philsports Complex sa Pasig City and Rizal Memorial Sports Complex sa Manila andam nang mo-host sa 10th Asean Paralympic Games, kini kung di mapahimuslan ang New Clark City (NCC) sa Capas, Tarlac nga kasamtangang gihimo nga quarantine center sa gipapauli nga Pinoy nga giingong may coronavirus disease (Covid-19).
Si Philippine Sports Commission (PSC) Chairman William “Butch” Ramirez nagyagyag niini atol sa Davao Sportswriters Association (DSA) Forum, Huwebes, Pebrero 27, sa The Annex sa SM City Davao.
Ang NCC, nga nagsilbing venue sa pipila ka aktibidad atol sa 30th Southeast Asian (SEA) Games 2019, una nang gitudlong venue sa Paralympic Games nga gi-reschedule sa di pa tino nga petsa tungod sa padayong hulga sa Covid-19.
“I don’t question the use of NCC as quarantine center. It is for national interest, you can’t question the leadership of the President. Sports can go ahead anytime. Lives of Filipinos are more vital than playing,” suma ni Ramirez.
Dugang niya nga ang pagpahigayon sa Paralympic Games sa Mayo gikan Marso ang di sab posible tungod ang ‘procurement process’ sa gobyerno sagad molanat og duha ka bulan.
Ang PSC Board, Philippine Olympic Committee ug ubang stakeholders magtigum alang sa update sa paghost sa nasud sa Paralympic Games.
“We pray that the coronavirus threat will soon diminish as economies in the world are already being affected,” suma sa PSC chief.
Samtang ubang PSC-organized programs nga na-postponed mao ang Philippine National Games, National Sports Summit, Batang Pinoy National Championships nga kasamtangang wa pay petsa tungod ginamonitor pa ang dagan sa Covid-19.