SUNOG sa kaudtuhon sa Sabado, Pebrero 29, miugdaw sa 320 ka mga balay sa Barangay Ibabao-Estancia, Mandaue City, usa ka adlaw sa wa pa buksi ang Fire Prevention Month.
Adunay 530 ka mga pamilya o 1,404 ka mga indibidwal ang kasamtangang mopuyo una sa Barangay Ibabao-Estancia gym.
Nasubo sab si Mandaue City Mayor Jonas Cortes, kinsa anaa sa maong lugar, nga nakakita sa mga Mandauehanon nga mawad-an og panimalay.
Sigon ni Cortes nga manghatag ang Dakbayan og hot meals isip pasiunang ayuda ngadto sa mga nasunogan.
Gipasalig ni Cortes nga i-reblocking ang maong lugar bisan pa og private owned kini.
“Whether private or public, kinahanglan og reblocking kay atong makita nga walay tarong nga access sa fire trucks. Mao nay problema nato,” ingon ni Cortes.
UNSAY HINUNGDAN?
Gisuta pa sa kabomberohan ang hinungdan sa sunog.
Base sa sulti sa mga residente nga butane ang hinungdan sa sunog, apan wala pa kini gikompirmar sa awtoridad.
“Atong ipasuta no kon naa ba gyuy butane diha, pero mao lagi we have to be extra careful,” sigon ni Cortes.
Nadawat ang taho sa sunog alas 11:40 sa buntag ug gipasaka sa second alarm alas 11:54.
Alas 12:34 sa udto, gisaka sa Task Force Alpha ang sunog.
Gideklarar nga under control ang sunog ala 1:08 sa hapon ug alas 2:45 sa hapon gideklarar nga fire out.
Dihang nahinabi sa Superbalita Cebu si Fire Marshall SFO1 Jade Roble, duty investigator, sigon niya nga nagsugod ang sunog sa ikaduhang andana sa balay ni Roel Mantos, nga gihimo niyang abangan.
Wa pa makuhai sa habig si Mantos sa kabumberohan tungod kay wa atol sa sunog.
Nikabat ngadto sa P2.4 milyones ang danyos sa sunog.
Padayon pang gisuta nilang Roble ang hinungdan sa sunog.
Nag-apod apod na ang mga social worker sa Mandaue City Social Welfare and Services (CSWS) ug relief goods ug hot meals ngadto sa mga nasunogan.
NAHADLOK
Trauma ang nasinati sa mga residente sa Sityo Buli, Barangay Duljo Fatima, niadtong Biyernes sa gabii dihang laing sunog na usab ang ilang nasinati nga miugdaw sa 15 ka mga balay.
Usa ka tuig ang milabay human maigo sa dakong sunog ang dapit.
Sa imbestigasyon ni FO2 Emerson Arceo, fire duty investigator, ilang nadawat ang alarma alas 6:29 Biyernes sa gabii samtang dali nga gisaka sa second alarm alas 6:37 sa samang adlaw.
Giingong nag sugod ang kayo sa pinuy-anan nila Julius Ybañez, alyas Jimboy ug Mary Anne nga giingong naglalis.
Giingong nibahad si Ybañez nga sunogon ang ilang balay, apan iya ning gihimakak atol sa imbestigasyon.
“Maoy nay ingon sa mga tawo nga naka dungog, Sir. Kining manag live-in ang ilang gitudlo halos sa mga silingan nga nag-away ang duha ug wala mag dugay kalayo na daw ang ilang sunod nga nakita,” butyag ni Arceo.
Tungod sa mao nga impormasyon, si Ybañez gitabangan sa pagkulata sa mga lumolupyo, apan natabangan siya sa mga fire volunteer nga daling nakauwang.
Di sila makapasaka og kaso batok kang Ybañez kay way mosaksi ug reklamante. /