PRANGKA kaayo nga gipadayag ni Mayor Tomas Osmena ang iyang kasagmuyo ngadto kang Vice Mayor Michael Rama gumikan sa pamahayag niini nga kon mapili siya pagkamayor, andam siya nga makig-alayon ug mokooperar sa kagamhanan sa lalawigan sa Sugbo kon mapili pag-usab si Governor Gwen Garcia tungod ug alang sa kalambuan sa Sugbo.
Niulbo ang kaspa sa mayor kay nasayod naman kita kon unsa ang relasyon ni Tomas ug Gwen. Mora man na silag iring ug iro nga dili magkadoul. Matod ni Tomas nga dili maayo ang maong pamahayag ni Rama kay dako kining insulto sa kandidatura ni Hilario Davide III, kinsa maoy gipaluyuhan sa Bando Osmena Pundok Kauswagan (BOPK) pagkagobernador.
Hinuon, gipatin-aw ni Mike nga ‘quoted out of context’ lang siya.
MANANGHID
Pastilan no, paet baya intawon kining kahimtang sa bise mayor. Dili siya makabuga og maayo sa iyang baruganan gumikan sa kahadlok ug kabalaka nga basin og lahi ang huna-huna sa iyang amo nga mayor. Wala na intawoy kaugalingon nga panghuna-huna si Mike. Morag gilangkatan na siya sa iyang katungod nga mopadayag sa iyang baruganan.
Mas maayo siguro ang buhaton ni Mike mananghid una siya ni Tomas kon unsa ang iyang itabi sa dili pa siya mobuka sa iyang baba aron dili siya masupalpal. Kay morag maka-uuwaw pag-ayo nga dili mauyonan sa mayor ang iyang gipamulong unya mokalit lang pod siya og balitok. Magpakatutuo ka Mike.
REAKSIYON
Ania koy nadawat nga reaksiyon gikan sa atong bumabasa kabahin sa atong lindog niadtong miaging adlaw sa plano ni Mayor Tomas Osmena nga mo-hire og dos mil ka mga batan-on alang sa summer jobs. Ang baruganan ni Ericson Gucela wala kini pamolitika. Ania ang iyang suwat.
“Maayong adlaw kanimo Super Bob. Usa ako sa mga readers sa imong kulom sa Superbalita.
Ako lang untang ipadayag nga unta ang pag-hire og mga batan-on ilabi na adtong mga estudyante para sa summer jobs sa City Hall dili na unta dudahan nga pamulitika ug dili unya sagulan og pamulitika.
Isip usa sa nakabenepisyo niini kaniadtong tuig 2005 ug 2006, uyon gyud kaayo niini kay makatabang man kini sa pinansyal ug sa sosyal nga aspeto kay ma-develop man abililidad sa batan- on sa pakighalubilo sa sa iyang ka-trabaho ug pagtaas sa iyang work ethics.
Gi-awhag nako ang mga batan-on nga masulod niining summer jobs nga dili unta magpagamit o himuon kining utang nga kabubut-on sa mga pulitiko aron ilang ibaligya ang ilang prinsipyo, kon di mag-awhag sila sa uban nga kabatan-onan sa pagpili og saktong ehemplo ug lider niining umaabot nga eleksyon. More power sa Sun.Star ug kanimo Super Bob!!”
(bobby@sunstar.com.ph)