NAGKAGRABE ang kainit sa panahon karon.
Ingon sa mosilaob ka o masunog ang imong bisan magbarog ka og kadiyot nga magbuwad sa adlaw.
Kon init sa bukid, mas init ang mga dapit sa mga siyudad kay gawas nga wa kaayoy mga kahoy, puno sab sa sementadong mga imprastraktura nga nagdugang sa kainit, matod sa Pagasa.
Ang nagkagrabeng kainit resulta sa global warming, nga dala sa grabeng pagbuga sa mga kemikal sa kahanginan nga makadaot sa kalikupan.
Laing nakaingon niini mao ang pinataka nga pagpalambo nga nakaguba sa kabukiran ug kalasangan.
Upaw na daan ang mga bukid, giungad pa kini aron mabutangan og kabalayan.
Sa una langas kaayo ang mga awtoridad nga makadaot ang pagkaingin sa kakahuyan kay gipamutol ang mga kahoy aron matamnan.
Apan wa gyuy nakabadlong sa pagpangguba sa kabukiran karon.Wa nay makaingin sab ang mga mag-uuma kay wa na may mga kahoy.
Di na sab ilaha ang mga yuta kay napalit na sa developers.
Samtang base sab sa mga pagtuon, dinhi sa Pilipinas, ang dako kaayog natampo sa pulusyon mao ang mga sakyanan sa kadalanan.
Unsa kahay maayo kon unya sa Earth Hour mohunong sab sa pagpadagan ang mga tawo nga dunay mga sakyanan? Di man tingali ni lisod alang nila.
Unya di lang kay sa Earth Hour lang kita mobuhat og lakang aron pagluwas sa kalibutan gikan sa climate change.
Tan-awon og maayo kon unsay malahutayon nga sulusyon, inay magpawong lang og suga usa ka oras sa usa ka gabii matag tuig.
Di ra sab ang pagsunog sa mga fuel ang nakaingon sa global warming. Apil na sab ang pagkaguba sa kabukiran ug kalasangan.
Mao ni nga hangtod nga di kita makaamgo nga tipik kita sa suliran, di sa solusyon, bisan pila pa ka Earth Hour ang pagahimuon, di gyud makab-ot ang tumong sa pagluwas ni Mother Earth.