TUNGOD kay silang tanan busy, lakip na sa mga konsehal sa Siyudad, sa kampanya, ang mga opisyal sa Luz ug Lahug nagkasabot sa pagpahigayon sa hearing sa duha ka mga barangay kalabot sa ilang mga utlanan unya na human sa Mayo 10, 2010 elections.

Ang katapusang hearing gipahigayon niadtong Enero pa, ug ang sunod nga mga schedule nauswag sa makadaghang higayon kay ang mga barangay official ug city councilors wa makatunga.

“They are amenable to have the scheduled hearings conducted only after the elections,” matod ni Atty. Jose Marie Poblete, Sangguniang Panlungsod secretary.

Click here for Election 2010 updates

Matod niya nga sagad sa mga opisyal wa makatambong tungod sa eleksyon.

Si Vice Mayor Michael Rama, city council presiding officer, nimando sa miaging tuig nga dalion ang pagsulbad sa kasungian.

Gusto niyang mahuman kini sa wa pay eleksyon aron di na sila mahasol.

Sa usa ka interview, si Luz Barangay Captain Nida Cabrera niingon nga sila nagkasabot nga mopresentar ang Lahug sa ilang mga ebedensya human na sa eleksyon.

“Busy man gud kayo, wala say tawong motunga sa council. So recess nalang gud, after elections nalang. Busy si (Lahug Barangay Captain) Mary Ann (de los Santos) unya busy sad ko,” matod ni Cabrera.

Si De los Santos magpapili sa pagka kongresista sa north district sa siyudad sa Sugbo, samtang si Cabrera modagan pagka konsehal sa dakbayan human siya aghata sa mga urban poor nga morepresentar kanila.Sila si Rama ug ang ubang mga konsehal nanagan sab. (RHM sa Sun.Star Cebu)