BAGUIO

Luzano: Sorry ti ABS-CBN inawaten ni Duterte, ngem!

Karit Ken Kayetket

HIGANTE manen a kontrobersiya ti impasngay ti senate inquiry itay nabiit panggep iti isyu ti prangkisa ti ABS-CBN. Daytoy ti balikas a “sorry.” Ania daytoy a sao ken apay a nagbalinen a paset ti inaldaw a panagaallatiw ti diskusyon iti amin a suli ti pagilian agingga iti ballasiw-taaw?

Intay lukiben dagiti pasamak, pards.

Gapu kano ta saan a naipatangatang ti political-ads idi ni Pres. Duterte (agkamkampanya pay laeng kadagita a panawen) iti napasamak a presidential election 2016. Sinakit ti nakem dayta ni Pres.

Duterte ket dita a namunganay ti basnotna a supalpalenna wenno lapdanna ti renewal ti prangkisa ti nasao a network. Ket iti uneg ti Senado iti naangay a hearing babaen iti Senate Committee on Public Services panggep iti prangkisa, mismo a ni ABS-CBN President ken Chief Executive Officer Carlo Katigbak ti “nag-sorry” kenni Pres. Duterte.

Simmaruno ditan ti adu nga espekulasyon ken panagamiris no ania ti sumaganad nga eksena. Itay nabiit, “inawaten” ti presidente ti “pa-sorry” ngem?! Guray, pards... sakbay nga intay bistabistayen ti nakuna a “sorry” issue... taldiapantayo pay biit dagiti dadduma pay a kontrobersiya iti kallabes:

***

Nakasangpeten ditoy pagilian ti grupo dagiti 445 a Pinoy manipud iti MV Diamond Princess Cruise ship sadiay Yokohama, Japan. Dagitoy ket inyawid ti dua a PAL-Chartered flights manipud Haneda Airport, Japan.

Ti repatriation ket indauluan ti Phil. Embassy sadiay Tokyo babaen iti pammilin ni Pres. Duterte ken ti Inter-Agency Task Force on Emerging Infectious Diseases (IATF-EID). Napalubusan a mayawid ditoy pagilian dagitoy a kailiantayo kalpasan a nag-negatiboda iti coronavirus disease (Covid-19) kalpasan iti nairuar a laboratory tests nga insayangkat ti Japanese Ministry of Health, Labour and Welfare (MHLW).

Ti immuna nga eroplano ket addaan 309 a pasahero ken dua a miyembro ti repatriation team manipud Department of Foreign Affairs (DFA) ken ti four-member health response team manipud Department of Health (DOH). Naibaba dagitoy sadiay Clark Airbase idi Pebrero 25.

Ti maikadua nga eroplano ket naglaon iti 136 a pasahero ken maysa a two-member DFA team ken maysa a five-member team manipud DOH. Ti grupo ket simmangpet sadiay Clark Airbase iti kina-agsapaanna. Amin dagiti repatriates, agraman dagditi taga-DFA, DOH repatriation team members ken PAL flight crew ket naideretso iti Athletes’ Village sadiay New Clark City, Tarlac para iti 14-day quarantine program ti Department of Health.

Nainayon pay iti padamag nga adda pay nasurok limapulo a Pinoy Crew ti Diamond Princess cruise ship ti nabati pay laeng kadagiti pagagasan sadiay Japan tapno maagasan gapu ta nagpositibo dagitoy iti virus ti corona. Sapay koma ta umimbagda amin.

***

Gapu iti nairakurak nga addan 1,146 ti nagpositibo a kinaptan ti Covid-19 ken 12 a natay sadiay South Korea, base iti rekomendasyon ti Inter-Agency task Force on Emerging Infectious Disease, impatungpal ti gobyerno ti Pilipinas ti “travel ban” nangruna sadiay Gyeongsang Province ti South Korea a mas mabigbigbig iti awag a Gyeonghuk kalpasan a ngimmato iti bilang dagiti nagpositibo iti Covid-19 sadiay.

Sakop ti travel ban dagiti turista nga agplanplano nga agturong iti nasao a disso.

Iti sabali a benneg, mapalubusan met dagiti Pilipino nga agturong sadiay South Korea no dagitoy ket permanent residents, agad-adal sadiay wenno addaan trabaho iti nasao a pagilian ngem masapul nga adda pirmaanda a waiver a mangipakpakdaar nga ammoda ti peggad a mabalinda a mangapektar iti salun-atda.

Ad-adalen pay laeng ti inter-gency no adda pay dagiti disso sadiay South Korea ti mairaman iti travel ban. Tsk tsk...makapasiggar dagiti paspasamak nangruna ta saanen a nagsentro ti epekto ti nakuna a virus sadiay China no di ketdi dimmanonen agingga iti middle east ken kabangibang a disso agingga’t Italya. Nupay awan anunsiyo ti WHO (World Health Organization) a world pandemic gapu iti Covid-19.

‘Bag laketdin ta no idilig kadagiti dadduma a pagilian a sinerreken ni Covid-19, maymaysa pay laeng ti pimmusay a biktimana ditoy pagilian, saan a Pinoy no di ketdi Tsino.

***

Nairakurak itay nabiit, nga addan nasarakanda nga agas (tallo kanon) ti Covid-19. Daytoy ket partuat ti China met laeng. Adda met dagiti agkunkuna a mabalin kano a makatulong a kas agas ti “langis ti niyog.” No pudno daytoy, saantayon a maibusan iti agas ditoy pagilian iti kinaadu ti niyog ditoy. Ngem awan pay pammasingked dagiti maseknan nga ahensiya ti Pilipinas panggep iti nakuna a damag. Ngem no sibibiag la koma daydi lolok, iti panagkitak, saan nga agas ti ipir-akna no di ketdi agsasamusam a “saludsod” a di ammo no addanto sungbatna iti umay nga aldaw.

Ania koma dagita a saludsod, lolong? Masigurok a ti sungbatna ket kastoy: Kasatno aya a simngar dayta a sakit? Apay a simngaw? Basta latta kadin simngaw wenno naisadya a maipasngaw? No naisadya...ania ti gapuna a nagpartuatda iti kasta a klase ti virus wenno sakit? Ania ti pakaaramatanna aya? No isuda met laeng idiay China ti nakailatangan ti nakuna a virus, apay nga adun a nasyon ti nairamraman? Apay nga awan umako iti dayta a biddut wenno kammali nga isisingngaw ti Covid-19? Tonetonelada ti letanya dagiti saludsod daydi lolok...a mabalin met salsaludsoden dagiti apektado a disso.

Ngem guray, pards...adda punto daydi lolok, saan aya? Kasatno a simngaw daytoy a sakit? Apay a napartuat dayta a virus? Nagtaudanna aya daytoy? Narigat ti agpugpugto laeng, pards. Sapay koma ta addanto rummuar a sungbat dagiti saludsod daydi lolok tapno ammotayo ti intay pabpabasolen ken sarsaritaen.

***

Subliantayon ti isyu panggep iti prangkisa kalpasan kenni Covid-19. Maulit a ti panagkiddaw ti ABS-CBN iti “sorry” wenno “dispensa” babaen kenni Katigbak (iti Senate hearing) ket inawaten ni Pres. Duterte.

“Yes, Eh, nandiyan yan. I accept the apology, of course,” sungbat ti presidente idi maamad kenkuana no ania ti makunana iti “pa-sorry” ti TV Network.

Innayon pay ni Pres. Duterte: “No, I said I’ll leave it to Congress,” sungbatna iti saludsod no pabor daytoy iti renewal ti prangkisa ti nasao a network. “But fundamentally, really, ang decision nasa House ngayon. Not so much of the Senate because the Constitution says all of these things must originate from the Lower House. Yan ang ano. Forget about all these, hullabaloo. Ang ano diyan nandiyan sa house. The critical move is in the House and I tell you I am not going to interfere. Wala talaga ako. Kung maniwala kayo, okay. Kung hindi...But those who knows me..who know me, alam nila.”

Idi madamag no awaten pay ni Pres. Duterte ti P2.6 million nga isubsubli ti ABS-CBN, kinuna ti presidente nga idonar laengen ti TV Network kadagiti mapilida a charitable institutions. Idi madamag no pirmaanto ni Pres. Duterte ti linteg para iti prangkisa, sungbatna: “I will cross the bridge when I get there.”

Kayatna a sawen, pards...kasla 50-50 pay laeng ti sasaaden ti prangkisa ti ABS-CBN. Kuna ti kaadduan, sapay koma ta malpasen ti kontrobersiya ta adu pay dagiti parikut ti pagilian ken serbisyo ti gobyerno a rumbeng a maatindaran.

Adios mi amor, ciao, mabalos.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph