MA-RENEW na gyod kining prangkisa sa ABS-CBN? Kini karon ang daghan kaayong mga pangutana ug iya-iya sa pagpagawas og mga opinyon dunay pabor, adunay dili, pero asa man gayud ang dapat nga matuman niini?
Didto kita sa mga eksperto sa balaod nagpakisayod mahitungod niini nga isyu, una, nagsugod sa personal tungod kay nagdiwal ang kasuko sa atong Presidente Rody Duterte tungod kay wala gipagawas sa ABS-CBN management ang iyang political advertisement sa milabay nga kampanya sa tuig 2016 presidential elections.
Sa bisan unsa paman nga katarungan, sa katapusan gi-angkon na sa ABS-CBN ang ilang kasaypanan ug gipaagi sa publiko ang ilang pagpangayo og pasaylo sa atong halangdong presidente, buot-ipasabot gidawat nila ang tinuod nga akosasyon sa atong presidente.
Usa ka interbiyo sa atong halandong pangulo kung unsay iyang baruganan sa pagpangayo og pasaylo sa ABS-CBN management, sumala sa atong presidente iya kining gidawat ug aduna pa’y pakapin nga dili na niya dawaton ang P2.8 milyon ug ihatag nalang kini sa charitable institution, agi'g dugang, namulong ang presidente nga ang bola karon anaa sa Kongresso kung angayan bang ma-renew ang prangkisa sa maong giant network.
Ang problema, kay mora'g nagpalugit ang Congress karong panahona? Hinaut unta nga walay pastilyas nga gipaabot ang Kongresso gikan sa tagdumala sa ABS-CBN, tungod kay mora'g wala na’y bili ang Qu warranto ni Solicitor General Jose Calida sa Korte Suprema, tungod kay wala ma'y mga violation ang maong network sa bisan asang sanga sa atong gobyerno, pulos man dunay mga clearance.
Dili sad maayo kung dili garantiyahan og prangkisa ang ABS-CBN tungod kay duna na’y panag-ingnan, ang GMA network, PLDT, CBCP network nga samtang wala pa matapos ang diskusyon sa ilang prangkisa sa Kongreso, gigarantiyahan man sila og duha ka tuig nga provisionary authority nga magpadayon sa pag-broadcast?
Sumala pa sa mga eksperto sa balaod, walay balaod nga magbugto sa mga lisensya sa mga dagkong kompanya tungod lang sa kalagot ug kasuko, kung walay mga kasupakan sa balaod nga nahimo.
Dili sad tingali i-reject sa Kongreso ang prangkisa sa ABS-CBN tungod kay gawas sa walay violation dagko kini og buhis nga gipasulod sa kaban sa atong gobyerno ug dili sab tingali siya makatugot nga daghang mga Pilipino nga mawad-an og trabaho.
Kung maaprobahan na sa Kongreso ug atoa na sa lamesa sa atong presidente, unya dili gyud niya permahan, mag-ihap nalang daw og 15 ka adlaw matud pa sa mga eksperto, "good as approved."
So? Wanay poblema ang ABS–CBN padayon na sa ilang operasyon, hinuon, dako kini nga pagtulun-an alang sa tanan, kung magnegusyo ka, ayaw saguli og politika aron pag-abot sa tumoy dili ka magproblema.