DAVAO DEL NORTE -- Ang lalis sa utang maoy gituohang motibo sa nahitabong insidente sa pagpanigbas tali sa usa ka 65-anyos ug sa iyang giutangan nga negusyante sa alas 7:20 sa gabii niadtong Sabado, Pebrero 29.
Giila ang biktima nga si Tecson Santo, 57, tag-iya og tindahan ug molupyo sa nahisgutang dapit.
Base sa imbestigasyon, nga samtang naglakaw ang biktima sa dalan Mahayahay Street, Bermudez Plains, Barangay Apokom, Tagum City, gitigbas kini sa suspek.
Nakaangkon og samad tinigbasan ang biktima sa liog ug bukton.
Human sa nahitabong insidente, daling miikyas ang suspek paingon sa wala masayri nga dapit.
Positibong giila sa biktima ang nagtigbas kaniya nga si Benjamin Moina Catungan, 65, molupyo sa Blk 31, Lot 45 sa susamang barangay.
Ang biktima gidali pagdala ngadto sa Davao Regional Medical Center pinaagi sa mga nagpakabanang lungsoranon aron siya matambalan.
Gibutyag ni Police Staff Sergeant Kerniel Catalino sa Tagum City Police Station nga nagkalalis na ang duha niadtong Biyernes sa gabii gumikan sa giingong utang sa suspek sa tindahan sa biktima nga wala mabayri.
Padayon pa nga gipangita karon sa kapulisan sa maong dakbayan ang ang suspek.