LAMBERTO G. CEBALLOS
Cawayan, Dalaguete, Cebu
PAG-ABLI ni Karlo sa iyang laptop nianang buntaga human niyag higop og kape didto sa kusina, didto sa iyang ‘e-mail’ may mensahe nga nag-ingon, ‘Jenny Verdad sent you a message.’
Gi-klik niya ang mensahe ug mitumaw ang ‘message’ ni Jenny sa Messenger. Si Jenny iyang ig-agaw igtagsa. Gibasa niya, “Kuya Karlo, kaslon na si Karen karong Mayo. Di ba uyab man mo sa wa pa ka moanha sa Manila aron manarbaho? Nagbuwag diay mo?” Mibawos siya, “Wa man mi magkabuwag, Day!”
Duha na ka tuig nga si Karlo naa sa Manila magtrabaho. Bayinte siyete anyos na siya ug nagtrabaho isip ‘senior auditor’ sa Karingal Garces Belandres & Associates, usa ka international auditing firm nga nag-base sa Manila. Certified public accountant siya. Sa dayon niyang anhi sa Manila nagkita sila si Karen sa usa ka restawran didto sa Ayala Terraces sa Cebu diin sila nanihapon.
“Hon, inigka regular nako sa KGB mopauli ko dinhi sa Cebu ug magpakasal ta. Mag-antos lang tag kadiyot nga magkalagyo. Be true to your promise nga ako lang imong higugmaon sa tibuok mong kinabuhi. Mao sab na akong panaad nimo!” giingnan niya si Karen.
“Be assured, Hon, I’ll be true to you. Promise!” ni Karen nga lulot kayo ang mga mata nga mitutok kang Karlo.
Human sila nanihapon nanan-aw silag sine. Nagkuptanay sila sa ilang mga kamot samtang nagtan-aw sa salida. Karon ug unya naghalok sila nga kinalit-kalit. Nakahigayon sila pag-ayo sa pagpakita sa ilang gugma sa usag usa kay wa kaayoy nanan-aw didto sa Lodge sa sinehan; ug didto sila magpahiluna sa kinaluyohang laray sa mga lingkoranan.
Sa bag-o pa si Karlo sa Manila kanunay ang ilang pag-teksanay ni Karen. Sa ‘e-mail’ sab may ‘private message’ sila pinaagi sa Messenger. Apan sa pagpanglabay sa mga adlaw inanay nga nagkahinay ang ilang kontakay. Nahigot si Karlo sa iyang trabaho. Kanunay siyang gipadala sa Indonesia, Malaysia, Singapore, Australia ug New Zealand aron pag-awdit sa mga kompaniya nga kliyente sa KGB. Sa iyang bahin, si Karen libang pod sa iyang pagka Accountant sa usa ka department store nga nahimutang sa Mabolo. Hangtod nga naputol gyud ang ilang komunikasyon.
May nanguyab kang Karen nga usa ka abogado. Iyang ka-batch sa hayiskol si Atty. Daniel Villahermosa. Kanunay silang magkita. Si Daniel maoy naghulip sa kahaw-ang nga gibilin ni Karlo. Wa madugay gidawat niya ang gugma ni Daniel nga desidido nga makigminyo kaniya. Iya nang gikalimtan si Karlo.
USA ka gabii samtang naghigda na si Karen sulod sa iyang kuwarto mitingog ang iyang selpon. Iya kining gipunit gikan sa ibabaw sa headboard. Incoming call gikan ni Karlo.
“Good evening, Hon! Kumusta ka? Long time, no hear!” ni Karlo.
Wala makatubag dayon si Karen. Mikuyanap sa iyang galamhan ang kahingangha nga mitawag si Karlo nga iya nang nahikalimtan tungod kang Daniel. Gipangulbaan siya. Unsay iyang ikasulti? Sa tinud-anay gimahal niya si Karlo kaniadto. Ug karon ang tawag niini nakadangilag sa nagka awop na nga pagbati.
“O-Okey ra m-man k-ko, H-Hon!” tubag ni Karen.
“Okey ka kay kaslonon ka na man. Huyang imong mga panaad!” ni Karlo. “Apan gusto kog ‘closure’ aron magmalinawon akong pagbati. Magkita ta karon dayon! Himoon nato nga pormal ug malinawon ang atong panagbuwag. Huwaton tika diri sa Blue Moon Motel. Okey?”
Nahimut-okan si Karen kadiyot, unya mitubag, “O-Okey!” Dali siyang nag-ilis ug nanaog. Misakay siyag taksi ug nagpahatod ngadto sa Blue Moon.
Sulod sa lawak sa motel gihimo nila ni Karlo ug Karen ang ‘closure’ sa ilang gugma. (KATAPUSAN)