WAY kabutangan sa kalipay ang magtiayon nga Alexander ug Jenelyn Tañedo sa ilang pagsagop og twins.
“We are very proud nga niabot ning kaluha kanamo kay nausab gyud among lifestyle,” matod ni Alexander, kinsa nidugang nga sa wala pa maabot ang kaluha sa ilang kinabuhi, kon sila laayon, manglakaw sila ug dili na magtagad sa oras.
“You have to be ready financially and emotionally,” tambag ni Jenelyn ngadto sa nagplano nga managop og bata. “Having twins maybe tiring sometimes especially after you came from work, but when they smile, it’s all worth it.”
Ang magtiayon nga Tañedo ang duha sa mga dinapit nga bisita sa kalihukan sa Department of Social Welfare and Development Field Office VII, nga nipaambit sa ilang gibati nga kalipay sa pagsagop og kaluha.
Ang DSWD 7 nibukas karong tuiga sa selebrasyon sa Adoption Consciousness Month. Aduna kini tema nga “Pagmamahal Palaganapin, Legal na Pag-aampon Ating Gawin!” (Spread Unconditional Love through Legal Adoption).
Subay niini, ang field office nagpasiugda og mga kalihukan niadtong Pebrero 22 hangtod sa 28, 2020.
Ang usa ka semana nga selebrasyon gisugdan pinaagi sa motorkada niadtong Pebrero 22 nga nanukad sa Cebu City hall paingon sa Home for Girls sa Barangay Labangon, siyudad sa Sugbo alang sa usa ka programa.
Atol sa programa, ang mga bata nga gikan sa mga sentro sama sa Asilo de la Milagrosa Center, My Bonita Homes ug Albert Schweitzer Familienwerk Foundation Inc. nibihag sa pagbati sa audience pinaagi sa ilang mga talento sa pagkanta ug pagsayaw.
Aron makadasig sa mga tawo nga gusto managop, si Kaking Sy, presidente sa Central Visayas Adoptive Parents Association (CVAPA) Inc., niingon nga “there is a propose bill that will simplify the process of adoption.”
Sa wala pa mahuman ang programa, gigakos sa mga staff sa DSWD 7 ang mga bata aron ipakita ngadto kanila nga dunay nagmahal ug nagpangga kanila.
Ang uban sa mga bata ang nakahilak sa gipakita nga gugma ug affection sa mga staff sa DSWD 7.
Ang selebrasyon gitapos niadtong Pebrero 28, 2020 pinaagi sa sunodsunod nga mga kalihukan ug aktibidad sama sa Short Film competition, Give it your best shot photo contest 2020, ug Dance of the Decades at SM City Cebu. (PR)