DUGANG 23 ka mga tunghaan sa siyudad ug lalawigan sa Sugbo ang gipangreklamo nga nangolekta og graduation fees nga usa ka dakong kalapasan sa kamandoan sa Department of Education (DepEd).
Ang Kabataan Partylist nga nilusad sa ilang text hotline 0932-9776985 nga mahimong kasumbongan sa mga ginikanan ug tinun-an batok sa mga tunghaang mangolekta og graduation fee, maoy nakadawat sa mga reklamo.
Nasayran nga dunay lima ka mga tunghaan ang una nang gireklamo nga mao ang Abellana National School nga nangolekta og P200, Placedo Senor MHS tag P450, Zaragosa Badian ES tag P260, Toledo City Vocational and HS tag P500+ ug Florencio Urot NHS tag P150.
Ning bag-o, napun-an ang mga listahan sa mga tunghaan sa Cebu City nga giingong nangayo og graduation fee ug kini naglakip sa Guadalupe Elementary School P 150+20 toga+ 100 cash, Pulang Bato Elem School P 20 sa tanang tinun-an, Gothong HS P250, Banawa ES P200 ug Don Vicente Rama HS, P500.
Sa lalawigan sa Sugbo mao ang Horacio Franco MNHS Libjo Tabogon P 500, Jugan ES Mandaue P 300, Mabase Daycare Center LLC P404, Labogon HS P 900 all contributions, Canduman ES P 220 +300 school fees, Pilipog Cordova ES P 165, Aloguinsan NHS P 350, Soong ES P 275, Mactan HS P 450, Sungko ES Bantayan Island P 280, Oslob NHS P 400 + P9 gikan sa 1st ngadto sa 3rd year, Talisay City Central School P 500+, Regino Mercado MNHS P 200, Kinatarcan ES Bantayan Island P200, Day-as Cordova ES P 250, Bankal ES Lapu-lapu City P 360, Buanoy Balamban HS P250 grad fee, P250 computer, P290 PTCA contribution ug P24 sinking fund ug ang Monpeller ES 200 + litson manok sa mga 1st honor.
Si Renil Oliva sa Kabataan Partylist niingon nga ang listahan ilang iduso sa DepEd aron maimbestigahan uban sa mga reklamante aron maoy mopamatuod sa mga reklamo.
“Unya nagplano gyud mi nga magpatawag mig conference kuyog sa mga ni reklamo kay kasagaran sa nag-text nag ingon nga gipugos gyud sila sa pagpaamot, unya kon dili sila mobayad dili i-release ang ilang cards, diploma, dili papasuhon, ug dili pirmahan ang clearance,” nagkanayon si Oliva.
Subling giklaro sa Kabataan Partylist nga dunay kamandoan ang DepEd batok sa compulsory collection alang sa graduation.
Ang mando sa DepEd giluwatan human mangreklamo ang mga ginikanan nga gipugos sila sa pagpaamot bisan di nila maabot ang gidak-on niini.
Kon duna may amutan, di pugson kadtong di makabayad niini, apan duna gyuy mga tunghaan nga milapas niini. (CPL)