USA ka 18 anyos nga dalaga nga tigbantay og computer café sa Barangay Duljo Fatima, Dakbayan sa Sugbo nasikop sa buy-bust operation sa Mambaling Police Station alas 12:45 sa Sabado sa kaadlawon, Pebrero 29, sa sitio Riverside.
Ang suspek giila nga si Alessandra Madrigal, 18, alyas Kadal, kinsa gitumbok nga high value individual regional level database, nagpuyo ra sa dapit, tinun-an sa high school.
Nakuha kaniya ang 795 gramos nga gituohang shabu nga mobalor og P5,406,000 base sa Dangerous Drugs Board (DDB) value. Matod ni Police Captain Francis Renz Talosig, hepe sa Mambaling Police Station, nga adunay mihatag kanila og impormasyon labot sa kalambigitan sa illegal nga drugas sa dalaga. Tungod niini, ila kining gipanid-an sud sa duha ka semana ug nasuta nga tinuod.
“Gi-validate na nato kay naa may nag-report nato nga kanang si Alessandra kay nagduwa man. Pero sa pagkakaron, wala pa nato ma-trace kon kinsa gyud ang iyang boss ba,” matod ni Talosig.
Dugang ni Talosig nga wa moangkon si Madrigal nga iya ang nakuhang illegal nga drugas.
Giingong makabaligya og 50 gramos ngadto na sa 100 grams sa gituohang shabu si Madrigal.
Wa niya gisalikway nga sakop sa sindikato sa illegal nga drugas sa Dakbayan sa Sugbo ang suspek tungod sa gidaghanon sa illegal drugs nga nakuha gikan niini.
Si Madrigal pasakaan og kasong kalapasan sa Section 5 ug 11 sa Republic Act 9165 kun Comprehensive Dangerous Drugs Act of 2002.
HVI NADAKPAN
Usa ka giila nga high value individual (HVI) nasikop human nakuhaan og dul-an sa P50,000 nga balor sa ginadiling drugas sa sud sa iyang balay sa sitio Ruiz, Barangay Tabunok, Dakbayan sa Talisay niadtong Biyernes sa gabii, Pebrero 28.
Giila ang dinakpan nga si Jonathan Rabi Cañeda, o mas naila nga Joy Cañeda, 49, minyo.
Dala ang search warrant batok kang Cañeda nga giluwatan ni Judge Jacinto Fajardo Jr. sa Regional Trial Court (RTC) Branch 66, gipatuman kini sa mga pulis sa Talisay City alas 6:40 sa gabii.
Nakuhaan si Cañeda og drugas nga motimbang og siyete gramos ug gibana-bana nga mobalor og P47, 600.
Ang mga silingan ug kabanay ni Cañeda di makatuo sa panghitabo ug sa pasangil nga mamaligyaay og drugas kay paghulagway nila nga maayong tawo si Cañeda. (AYB, FMD)