TERMINATION sa kontrata ang sangpotan sa mga kontraktor nga maoy nagtrabaho sa road improvement projects sa lalawigan sa Sugbo.
Gikinahanglan nga mahuman na sa mga kontraktor ang proyekto niadtong Sabado, Pebrero 29, 2020.
May mga tawo nga mosusi sa lugar aron pag-validate kon nahuman ba nila kini sa nasabotan nga deadline.
Matod ni Gobernador Gwendolyn Garcia, putlon na niya ang kasabotan tali sa mga kontraktor nga wa makatuman sa gihatag nga adlaw pag human sa proyekto.
“It’s really what I told them. I-terminate mo og dili na mo mo-qualify sa sumpay ana nga inyong gisugdan nga dalan,” matod ni Garcia sa mga tigbalita.
Si Garcia niluwat og Notice to Proceed (NTP) sa Nobiyembre 14, 2019.
Nasagmuyo siya tungod sa hinay nga pag-irog sa trabaho sa mga kontraktor.
Nigahin og moabot sa P714 milyones nga kantidad sa road improvement projects ang Lalawigan nga giaprubahan sa Hunta Probinsyal sa Nobiyembre 2019.
Sa kinatibuk-an, may 160 kilometros nga dalan sa mga barangay nga gibahin sa pito ka distrito.
Pasabot sa mga kontraktor nga ang pag usab-usab sa panahon mao ang dako nga problema nga giatubang nila.
Tungod sa uwan, mahunong ang pagtrabaho sa kadalanan.
May 16 ka mga kontraktor nga gihatagan og kapasidad nga makahuman sa proyekto.
Kini mao ang Jo Builders, AR Adlawan, YBK Construction, Circle Z Ventures and Development Corp., April Rose Enterprises and Builders, Quirante Construction, B.L. Pangan Construction ug Dinah Jane Construction and Supply, P.B. Obial Construction/First Grandeur Builders JV, Helm Construction and Supplies, First Builders and Developers, WTG Construction and Development Corp., Rovilla Construction, Duros Development Corp., JFAP Construction ug Rex Morales Construction. (B)