GIPAMATUD-AN ni Roman "Chocolatito" Gonzalez nga anaa gihapon kaniya ang kalidad sa usa ka world champion bisan pa sa iyang 32 anyos nga panuigon.
Dul-an sa duha ug tunga ka tuig human sa iyang brutal nga kapildihan, si Gonzalez (49-2, 41 KOs) nakalabni og laing super flyweight world title pinaagi sa pag-knockout sa kanhi wala pay pildi nga si Kal Yafai (26-1, 15 KOs) sa ikasiyam nga round sa away kagahapon didto sa Frisco, Texas.
Kon kahinumdoman si Gonzalez, ang gikonsiderar nga usa sa mga pound-for-pound best fighter kaduha pildiha ni Srisaket Sor Rungvisai, katapusan niini mao ang knockout nga kapildihan sa fourth round.
Ang tuo nga kumo ni Gonzalez maoy mipahagba ni Yafai sa kanbas nga gani ang referee nga si Luis Pabon ang dali gilayon miwarawara sa iyang kamot nga nag-signal nga undangon na ang away.
Kini maoy nagsilbing usa sa mga undercard sa main event fight tali nila ni Mikey Garcia ug kanhi WBO 147-pound Jessie Vargas sa Ford Center sa The Star.
Sa away, midaog si Garcia pinaagi sa decision. Ang judges mipabor kang Garcia - Cathy Leonard (116-111), Steve Morrow (116-111) ug David Sutherland (114-113).