GIPAHIBALO karon sa Davao City Human Resource Management Office (HRMO) nga dunay 800 ka mga vacant regular positions. Abli nga bakanteng trabaho, alang sa mga Dabawenyos.
Si Davao City HRMO head Lemuel Ortonio nagbutyag nga mga plantilla position kini, "We have around 3,300 plantilla positions. But, as of now, we only have around 2,500 plantilla positions that are filled."
"Naa pa ta'y mga opening for doctors, lawyers, engineers -- specifically civil engineers and mechanical engineers to be assigned sa City Engineer's Office (CEO) and Office of the City Building Official, and of course, nurses and mga dentist to be [deployed] sa City Health Office," dugang sa opisyal.
Apan gipasabot sa opisyal nga di kini tanan dungan nga naka-post, "We schedule our interviews for the vacant plantilla positions. As of now, we have already fixed the schedule up until June of this year. Gina-follow nato ang tanan nga standards that are being set by the Civil Service Commission, which includes ang atoang recruitment and appointment."
Kini karon ang gikalipay sa mga Dabawenyos labi na kadtong mga nakahuman sa pagtuon, kay sila man gayod ang unang makakuha niini nga mga bakante nga posisyon subay sa mga rekesitos sa Civil Service Commission (CSC).
Ang labing mas hatagan pa unta og higayon sa lokal nga kagamhanan ning siyudad kung paunsa modaghan ang bakante nga trabaho alang ngadto sa mga wa tawon kahuman sa pagtuon.
Hinuon duna ma'y mga trabaho alang nila, gani daghan na ang nakatrabaho diha sa City Hall, apan kung subayon ang ihap, daw kulang, tungod mas daghan ang nanginahanglan og trabaho nga wala nakahuman sa pagtuon.
Pero og di gyod makakuha sa kahigayonan sa trabaho bisan nakahuman o wala, ang labing mas maayo, manikay-sikay ug mangita og lahi nga pamaagi aron di maglisod, angay nga magkugi ug di magtinapulan.