DUHA ka mga bangga sa sakyanan ang natigayon sa managlahing dapit sa probinsya sa Bukidnon nga ningkalas og lima ka mga kinabuhi.
Unang insidente gikalambigitan sa usa ka Isuzu forward truck nga gimaneho ni Edgardo Badan, 59, minyo, taga Purok 5A, Damilag, Manolo Fortich, Bukidnon.
Giingong napuwas ang propeller shaft niini ug mibunal sa dalan maoy hinungdan nga lakip sa napuwas ang atubangan nga ligid miresulta nga miwagol kini tunga sa dalan ug nagtuyok-tuyok.
Gumikan niini, ang trak mibangga deretso sa nakaparking nga road roller heavy equipment ug laing duha ka mga concrete mixer nga gipanag-iyahan ni Eduardo Canlas kinsa subcontractor sa MAC Builders.
Tungod sab sa grabeng impak ang mga sakay sa likod ang nalabay ug didto nabunal sa mga nakaparking nga heavy equipment.
Duha ka mga sakay nga giilang sila Rudy H. Ganol ug Nilo B. Lahayon, residente sa Gauron, Barangay Sankanan, Manolo Fortich, Bukidnon ang gideklarar nga dead on the spot ni Dr. Norman James Y Roa, MD, sa Impasugong Rural Health Office.
Unom ka mga pasahero ang gidala sab sa Bukidnon Provincial Medical Center (BPMC) sa Malaybalay City, Bukidnon tungod sa mga grabeng naangkon apan dead on arrival sab ang duha niini nga giilang sila si Nelson Gumaling, 53 years, ug Rogelio Benoy, taga Zone-7 Barangay Sankanan, Manolo Fortich, Bukidnon.
Ubos pa sa medikasyon ang laing upat nga giilang sila si Rolando Arante, Celso Bahaynon, Nildo Balcueva, ug Junel Balcueva, pulos mga residente sa Manolo Fortich, Bukidnon.
Samtang laing bangga na usab nga natigayon sa Sayre Highway, P-8, North Poblacion, lungsod sa Maramag, Bukidnon.
Kini gikalambigitan sa usa ka Yamaha YTX tricycle nga gimanehon ni Ryan Gregory Lao, 30, taga P-8, North Poblacion, Maramag, Bukidnon; usa ka Suzuki Raider nga motorsiklo gimaneho ni Jonny Subsuban Agbu, 21, taga P-5, Old Damulog, Damulog, Bukidnon; ug usa ka Yutong truck bus nga gimaneho ni Joonee Pelayo Remulta, 38, taga P-5, Lumbo, Valencia City.
Sa imbestigasyon sa kapulisan sa Maramag Police Station, nasuta nga ang tricycle paingon sa south nga bahin ug mo-U-turn unta apan kining motorsiklo nga katabo ang nasangit sa tricycle, hinungdan sa pagkaligid sa motorsiklo paingon sa pikas lane.
Sakto maoy pag-agi sa bus nga pa norte nga bahin, hinungdan nadaganan ang driver sa motorsiklo.
Gidali og dala ang biktima nga si Agbu sa Bukidnon Provincial Hospital sa rescue team apan dead on arrival nga gideklarar sa doktor.
Gumikan sa sunod-sunod nga insidente sa bangga, si Police Colonel Roel Lamiing, ang director sa Bukidnon Police Provincial Office, nimando sa kapulisan nga estriktong ipatuman ang balaod sa trapiko ug magpahigayon og mga checkpoints aron luwas ang mga motorista.