DUDA. Maayo ang katuyoan ni Cebu city Mayor Edgar C. Labella sa pagmugna sa Mayor’s Information and Liaison Office (MILO) apan dili kalikayan nga magduda ang mga kapitan nga di nila kaalyado sa partido labina kon ang itudlo ni Mayor Labella kaatbang sa pulitika sa kapitan sa miaging piliay.
Bisan tuod way gipili nga kapitan si Mayor Labella sa iyang pamaagi, apan tungod sa gibuhat ni kanhi Mayor Tom Osmeña diin iyang gibutangan og BMO (Barangay Mayor’s Office) ang mga barangay nga ang kapitan dili niya kaalyado mao nga karon dunay pagduda ang mga kapitan sa pagbutang ni Mayor Labella sa Milosa matag barangay.
Gani, sa ngan lang, Milo, daghan ang wa makauyon. Daghan og gisugyot nga ngalan si Torni Frank, apan mas nakauyon ko sa gisugyot ni Atty. Cheking Seares nga ngalan - MELO kun Mayor’s Extension and Liaison Office. Pero kon as English pa, “what’s in a name” kon ang katuyoan sa kagamhanan ni Mayor Labella mao ang kaayohan sa tanan.
Apan lagi duna man gyuy mga bata-bata sa mayor nga mopahimus sa posisyon labina kon ang itudlo iyang mga kaalyado sa pulitika nga napildi sa miaging piliay. Di kalikayan nga magduda ang mga kasamtangan opisyal sa mga barangay nga dili kaalyado sa mayor sa tinuoray nga katuyoan sa Milo.
Mogawas man gud nga morag nangispiya o di bantayan ang mga lihok sa mga barangay opisyal nga dili kaalyado sa pulitika ni Mayor Labella sa iyang ibutang nga iyang representante nga maoy molingkod sa Milo nga anha mag-opisina sa barangay hall.
Si Bise Mayor Mike Rama, nga kauban ni Mayor Labella sa partido, lahi usab ang iyang panan-aw sa MILO. Hinuon, di ikahibung kon mopagawas si Bise Mayor Rama sa iyang lahi nga opinyon kabahin sa MILO tungod kay di man na siya papugong sa iyang gusto isulti.
Si Brgy. Inayawan Kap. Kirk Bryan Repollo, usa ka abogado ug kaalyado sa BOPK ni kanhi Mayor Tomas, mipadayag nga ilegal ang Milo. Apan ang Department of Interior and Local Government (DILG-7), Region 7, nag-ingon nga legal ang Milo nga gimugna ni Mayor Labella.
Nganong nahimong kontrobersiya ang Milo ni Mayor Labella, nga alang man unta ni sa kaayohan sa tanang barangay ug sa mga lumolupyo? Tungod ni sa pagduda nga usa ni ka pangandam sa pundok ni Mayor Labella sa sunod piliay, Mayo 2022. Nakita man gud sa kadaghanan nga modagan gyud pagka mayor si Bise Mayor Rama bisan pa sa iyang pagnegar.
Sa FB sa Milo sa Barangay Apas, diin ang kapitan dili kaalyado ni Mayor Labella makita ang hulagway ni Mayor Labella ug ang sa iyang motto: “Serbisyo sa Katawhan, Uban ta sa Kausaban.” Ang Milo sumala sa gisulti ni Mayor Labella, maoy tulay sa iyang opisina ngadto sa kabarangayan.
Hinuon, dako ko og pagtuo nga makatabang kining Milo sa mga gimbuhaton sa barangay sama sa basura nga dili mahakot sa skedyol ug sa karsada nga guba na ug wa giatiman sa mga barangay opisyal tungod kay dili sila kaalyado sa mayor.