Super Bilib: Mag doktor unta, apan na pulis

WA MAGDAHOM: Si Cebu City police officer-in-charge Colonel Engelbert Soriano wa maghom nga sangunan siya sa pagdumala sa kapulisan sa Dakbayan sa Sugbo kay daghan pa ang mas senior niya og ranggo. Apan alang kaniya, ang Diyos maoy nagbuot sa tanan. (Arnold Y. Bustamante)
WA MAGDAHOM: Si Cebu City police officer-in-charge Colonel Engelbert Soriano wa maghom nga sangunan siya sa pagdumala sa kapulisan sa Dakbayan sa Sugbo kay daghan pa ang mas senior niya og ranggo. Apan alang kaniya, ang Diyos maoy nagbuot sa tanan. (Arnold Y. Bustamante)

GUSTO unta siya nga mahimong doktor, apan ang kadaku sa galastuhan, nahimong babag.

Naa pay higayon, nga tungod sa ka debotong Katoliko sa iyang pamilya, nakahuna-huna siya nga magpari. Apan hayan nakatakda nang kapalaran niya nga mahimong pulis.

Wa sa plano ni Cebu City Police officer-in-charge Police Colonel Engelbert Soriano nga mag pulis, apan hayan, kini ang natakda sa kapalaran.

Siya ang kinamaguwangang anak sa pito ka mga magsuon.

Si Soriano nasulod sa Philippine National Police (PNP) niadtong 1996, human siya dasiga sa iyang amahan, kanhi sakop sa nabungkag nga Philippine Constabulary (PC).

Sa una, ang iyang amahan nga si Engracio Soriano maoy midasig kaniya nga mokuhag kurso sa medisina.

Tungod kay buotan nga anak, si Engelbert nisunod sa sugyot sa iyang amahan.

Iyang natapos ang kursong Bachelor of Science in Medical Technology sa Far Eastern University (FEU) niadtong 1993. Preparasyon kini aron madoktor.

Apan sa dihang natapos niya ang iyang kurso ug nahimong lisensyadong medical technologist sa edad nga 20 anyos, wa na siya maka-proceed sa kurso tungod sa ka mahal sa gasto.

Iyang gipasigarbo nga human sa graduation niadtong 1994, pagka Septiyembre sa samang tuig, nikuha dayon siya og board exam ug nipasar.

Naminyo siya niadtong 1999 kang Mary Grace Romero. Sila gigasahan og duha ka mga anak nga pulos senior high school.

Nagpulis

Human matapos ang kurso, apan wa pa makasulod og trabaho, nisugyot kaniya ang iyang amahan nga suwayan ang pag apply sa PNP.

Nianang pagka 1995, ni-apply siya pagka pulis sa National Capital Region Police Office (NCRPO).

Sa dihang gipasa na niya ang iyang mga papel, adunay nakabantay kaniya nga gradwado ug lisensyado pagka medical technologist, naatol nga ang PNP Crime laboratory sa Camp Crame nanginahanglan niini.

Aron maniguro nga madawat. ni-apply usab siya sa lain ug pulos siya nadawat.

Apan iyang gipili ang Crime Laboratory tungod kay diretso na sa lateral entry, buot pasabot nga kon madawat na, ang iyang ranggo diretso na sa pagka police lieutenant kon police inspector kaniadto.

Bisan kon siya nasulod na sa serbisyo sa PNP, wa siya mohunong sa iyang pagtuon, si Soriano nikuha og kursong Bachelor of Laws ug Criminology. Pulos kini niya nahuman.

Dugang ni Soriano nga sa bata pa lang siya, damgo niya nga mahimong pari ug moalagad sa Ginuo, apan wa kini mahinayon tungod sa kamahal sa tuition sa seminaryo.

Deboto nga Katoliko ang pamilyang Soriano, lumad nga taga Barangay San Rafael, lungsod sa Santo Tomas, Probinsya sa Isabela.

Bisan kon siya Katoliko, matod niya nga karon nga samtang nagkataas ang iyang pangidaron, iyang nadiskobrehan nga ang kaluwasan makuha sa tawo pinaagi sa iyang personal nga pagtuo. Di ang simbahan ang makalangit sa tawo.

Mga nahimo

Sa iyang karera sa PNP, nahimo siyang section chief sa Southern Police District, nabalhin sa Quiapo sa Western Police District sulod sa kapin sa usa ka tuig.

Sulod sa siyam ka mga tuigm nag-alagad siya sa Police Regional Office sa Cordillera.

Nahimo usab siya nga chief of police sa Cawayan City Isabela police station sulod sa usa tuig ug deputy provincial director sa maong probinsya.

Nabalhin na usab siya sa Aviation Security Group sa kaulohan ug nahimong full-fledged colonel samtang siya nadestino sa probinsya sa Bicol sa dihang iyang gihuptan ang Aviation Security Group.

Nahimo usab siya nga officer-in-charge provincial director sa Camarines Sur, division chief sa Directorate for Information and Communication Technology. Pagka 2019, nahimo siyang regional chief sa Regional Personnel and Records Management Division.

Pagka Decembre 2019, gitudlo nga OIC sa CCPO human girelibohan sa katungdanan si Police Colonel Gemma Vinluan.

Wa magdahom si Soriano nga maabot siya sa Central Visayas ug mahimo pang OIC tungod kay daghang mga senior official sa PNP nga nagtinguha nga mohupot sa maong posisyon.

Ang labing dako nga kalampusan ni Soriano sa iyang karera ang malampuson ug malinawon nga kalihukan sa Sinulog 2020.

Laing daku niyang kalampusan mao ang pagkasakmit sa minilyon ka pesos nga balor sa drugs. Ang CCPO mao ang nag-una sa rehiyon sa labing daghang nasakmit.

Taliwa ning tanan, nagtuo si Soriano nga ang Diyos nagbuot sa tanan tungod sa iyang hugot nga pagsalig. Iyang motto sa kinabuhi mao ang “God provides.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph