MGA kabtangan sa giilang drug queen nga nadakpan sa buy-bust sa Police Regional Office PRO) 7 takdo nga usa ka tuig karon, Martes, Marso 3, gi-freeze sa korte human gituohan nga ang kwarta nga gipatukod sa duha ka dagkong panimalay gikan sa kita sa ilegal nga drugas.
Pasado alas 10:00 sa buntag kagahapon, Marso 2, nag-uban sa ang PRO-7 pinangulohan ni Police Brigadier General Albert Ignatius Ferro, Representante sa Anti Money Laundering Council pinaagi ni Rommel Trijo ug Philippine Drug Enforcement Agency 7 sa pagpanguna ni Wardley Getalla aron i-serve ang freeze order gikan sa Court of Appeals sa kaulohan sa mga kabtangan ni Jocelyn Encila.
Si Encila ang nanag iya sa duha ka mga dagkong panimalay sa Barangay Casili ug Jugan sa lungsod sa Consolacion nga gibanabana nga mobalor ang matag usa og P5 million.
Gibutangan og paskin ang gawas sa balay nga pahibawo nga ang balay gi freeze na ug dili na mahimong gamiton sa kabanay o nibisan kinsa.
Matod ni Ferro, ang duha ka mga dagkong panimay nga gipanag-iya ni Jocelyn maoy gihimong bodega sa supply sa ilegal nga drugas gikan sa iyang main source nga si Rustico Repuela Ygot.
Si Ygot ang kanhi live in partner ni Jocelyn nga naa na karon sa New Bilibid Prison ug gani aduna silay mga anak.
“These places are very ideal to hid contraband. They are located in remote areas and surrounded by high walls. I’m sure it had a lot of security cameras installed,” matod ni Ferro.
Niadtong Marso 3, 2019, nasikop sud sa balay sa mga ginikanan ni Jocelyn human makuhai og 10 kilos sa gituohang shabu nga mobalor tanan og P68 million.
Unang nadakpan ang down line niini nga si Elymar Ancajas sa Barangay Inayawan sa dakbayan sa Sugbo nga nasakmitan og kapin sa 17 kilos nga shabu nga adunay kantidad nga kapin sa P72 milliion.
Si Rommel Trijo, legal officer sa Amlac, nipasabot nga ang freeze order sa korte kabahin kini sa proseso nunot sa pagsugod na sa deliberasyon sa kasong civil o pagbawi sa mga kabtangan sa mga nalambigit sa illegal nga drugas pabor ngadto sa gobyerno.
Kon mamatud-an sa korte nga ang gigasto sa pagpatukod sa maong mga balay gikan sa illegal nga drugas mapunta kini ngadto sa panudlanan sa national government.
Gawas sa duha niya ka mga balay sa maong lungsod mimando, usab ang korte pag freeze sa unom ka mga bank account ni Encila, pito ka real properties diin usa niini naa sa dakbayan sa Dumaguete ug duha ka sakyanan, lakip na niini ang alahas nga mobalor sa kapin P28,000 nga naa sa kustodiya sa kapulisan sa Consolacion.
Si Police Major Gerard Ace Pelare, kanhi hepe sa Consolacion Police Station nga maoy nangulo sa pagronda sa balay ni Encila, niingon nga sukad sa anti drug operation takdo nga usa ka tuig na karon, Marso 3, wala nay nagpuyo sa duha ka mga balay.
Si Getalla nalipay sa kalamboan gikan sa korte pag pugong na sa mga kabtangan ug kwarta sa mga nalambigit sa illegal nga drugas.
Nagpasabot kini nga seryoso ang gobyerno pag puhag sa gamot sa problema sa illegal nga drugas ug mo kuha sa napundar niini nga mgma butang.
Dili kini ang labing unang pag pugong sa mga kabtangan niadtong nalambigit sa illegal nga drugas tungod kay niadtong Agusto 11, 2017, ang kanhi PDEA-7 Director nga si Yogi Filemon Ruiz ang nangunay sa pag duso sa freeze order sa duha ka bank accounts ni self-confessed drug lord Franz Sabalones nga adunay deposito nga minilyon ka pesos.
Gawas sa iyang mga bank account, matod ni Ruiz aduna pa kini real properties sa lungsod sa San Fernando ug sa barangay Guadalupe sa dakbayan sa Sugbo nga mobalor ang tanan og P350 Million.
Ang kaso niini nagpadayon pa sa Court of Appeals (CA) sa kaulohan.