GINANAW ni George ang palibot aron sa pagpangitag bisan unsa nga sarang ikakuhit sa nag-inusarang hinog nga bunga sa kapayas diha sa ilang natad. Igasa niya kini kang Rochelle, ang iyang uyab. Paborito kini ni Rochelle. Ug dihang wala gyuy nakitang butang nga ikakuhit sama sa lipak, nakahukom si George nga katkaton na lang. Gikatkat niya ang punoan sa kapayas ug gipungis ang bunga.
“Hapit na ko mo-retire pagka chicks boy, Parts!” pasiatab ni George ngadtong Erwin, iyang barkada, dihang nag-inom silag beer sa usa ka restawran.
“Estoryahi!’miyamiid ni Erwin.”Ikaw mohunong nas imong pagka palikero? Patuoha ang imong Lolo!”
“Lagi, Parts, mor pa!” ni George dayong kuros sa duha ka tudlo sa iyang liog.”Nakit-an na nako ang babayeng akong dad-on sa altar sa kaminyuon!”
Si Rochelle ang gipasabot ni George.Tungod kaniya gipangbuwagan ni George ang kapin sa usa dosena niyang mga uyab. Diha kang Rochelle niya nakita ang tanang hiyas nga kaniadto gituohan niya nga wala nay babaye nga naghupot. Gawas nga maanyag, buotan, kugihan ug responsable si Rochelle. Ug ang labing nakapadayeg kaniya mao ang pagka konserbatibo niini. Kay tiaw mo bay, kutob lang gyud siya sa halok bisan moupat na ka tuig ang ilang relasyon .Wala pa gani siya makahimo bisan sa paghinol man lang sa mga moto sa dughan niini. ‘No touching below the necklace’ maoy prinsipyo ni Rochelle. Lahi siya sa uban nga mga nauyab ni George nga kadali rang gisurender ang ilang bandera bisan sa hamubong panahon sa ilang relasyon.
Nianang pagka gabii human sa ilang kasal, dihang nakalakaw na ang tanan nilang mga bisita, naghinam-hinam si George nga misulod sa ilang lawak sa hotel diin sila mo-check in alang sa ilang honeymoon. Naglumpayat sa kalipay ang iyang dughan nga naghunahuna nga makita ug maangkon na gyud niya ang kinatibuk-ang kaanyag ni Rochelle. Apan nahimut-okan siya dihang maoy misugat sa iyang mga mata si Rochelle nga masulob-on. Sama nga adunay nakahasol sa hunahuna niini. Naghinuktok kini, ingon sa wala sa kaugalingon, kansang panan-aw gitutok sa halayo, lagbas sa bildong bentana sa lawak. Bisan sa maong sitwasyon gigakos ni George si Rochelle ug gihagkan ang mga ngabil niini.
‘Hon, pasayloa ko nga karon ko pa ikaw sultihan mahitungod sa akong kahimtang!” Ang maong mga pulong ni Rochelle daw naka patibuok sa iyang pagduda kaganiha lamang.
“Ang buot mong ipasabot, Hon, nga dili ako ang...” Unya mikusog sa pagbutok-butok ang dughan ni George sa di masabot nga pagbati.
“Di mao kanang naa sa imong hunahuna, uy! Usa ko ka cancer survivor!” ni Rochelle. “Maayo gani kay sayo nga nadiskobrehan nga aduna akoy breast cancer. Busa nadala pa sa chemotherapy. Apan kinahanglan mang kuhaon ang cancer cells sa akong tuong suso, busa miagi kog surgery.”
“Wa gyud nako dahuma nga karong gabhiona mao ang ikaduha kong pagkatkat sa kapayas nga usa ray bunga!” hagawhaw ni George sa iyang kaugalingon samtang padayon nga naminaw sa gisaysay sa iyang asawa. (Katapusan)