SA IKADUHANG higayon, nauswag na sab ang pagpahigayon sa Central Visayas Regional Athletic Association (Cviraa) Meet sa Dumaguete City gumikan sa hulga nga hatod sa coronavirus disease (Covid-19) outbreak.
Ang Department of Education (DepEd) Region 7 nakadesisyon nga ipahigayon na ang matag tuig nga kompetisyon karong Marso 21-28.
Ang Cviraa, nga orihinal nga gikatakda niadtong Pebrero 22-29, unang giuswag niadto untang Marso 15-21.
Sa miaging buwan, gipangkanselar o kaha gipang-uswag sa DepEd ang ilang mga kalihukan nga apilan og daghang mga tawo isip pag-amping sa padayong pagpanghulga sa Covid-19.
Sa ilang regional memorandum, ang tanang mga opisyal sa delegasyon gimanduan sa DepEd sa pag-andam sa tanang mga kinahanglanon ug paghan-ay og plano alang sa mga posibleng emerhensya nga mahitabo sa pagbiyahe, sa mismong kompetisyon ug sa temporaryong puluy-anan sa mga delegasyon.
Gimanduan ang matag head of the delegation nga ipahibalo ang ilang mga plano sa matag miyembro sa delegasyon.
Ang Cviraa, nga maoy qualifying event alang sa Palarong Pambansa, salmutan og 19 ka mga delegasyon nga pangulohan sa many-time defending champion Cebu City.
Ang ubang mga delegasyon mao ang Lapu-Lapu City, Dumageute City, Cebu Province, Tagbilaran City, Mandaue City, Danao City, Bayawan City, City of Naga, Talisay City, Bogo City, Toledo City, Bais City, Siquijor, Guihulngan City, Carcar City ug Tanjay.
Kini maoy ikaduhang sunodsunod nga katuigan nga kombatihon ang Cviraa sa Dumaguete City.
Ang sporting events nga naglangkob sa kompetisyon mao ang athletics, archery, arnis, badminton, billiards, baseball, basketball, 3 on 3 basketball, boxing, chess, football, futsal, sepak takraw, softball, swimming, tennis, table tennis, taekwondo, volleyball, wrestling, wushu, pencak silat, gymnastics, aero gymnastics ug dancesport. (RSC, ESL)