GISUSPENSO sa Maritime Industry Authority (MARINA) 7 ang operasyon sa MV Mika Mari III kini human napagngan ang maong barko nga gikan sa pantalan sa dakbayan sa Danao nga paingon unta sa Consuelo port sa isla sa Camotes niadtong Lunes sa hapon, Marso 2.
Samtang subay sa mga insidente nga nalambigit ang barko sa Jomalia Shipping Corporation, ipaubos sa re-inspection ug audit ang tanang barko niini.
“With the past maritime incidents involving the ships of Jomalia Shipping Corporation and the recent maritime incident on 02 March 2020 involving its ship name MV “Mika Mari III” plying the Danao City - Consuelo, Camotes and vice versa route, MARINA VII has undertaken concrete measures which are aimed at preventing the lives of their passengers and crew from undue risks,” matod ni MARINA 7 regional director Engr. Marc Anthony Pascua.
Nasayran nga alas 2:30 sa hapon dihang nibiya sa pantalan sa Danao ang maong barko nga aduna’y sakay nga 133 ka pasahero, 17 ka tripolante, ug 16 ka rolling cargoes nga paingon sa Consuelo Port, Camotes.
Nakadawat og tawag ang Coast Guard Sub-station Camotes kabahin sa insidente sa MV Mika Mari III nga nakasinati kini og problema sa makina hinungdan nga wala kini makapadayon sa paglayag.
“Initial info revealed that the cooling system of the distressed vessel malfunctioned that caused their main engine to overheat and eventually fail,” matod ni Coast Guard District Central Visayas spokesperson Lieutenant Junior Grade Eric Salcedo.
Daling nagpadala og team ang CGSS Consuelo ang ilahang motorbanca paingon sa lokasyon sa maong barko nga anaa duha ka nautical miles o dul-an tulo ka kilometros sa Consuelo Port.
Lakip nga ni-responde ang sister vessel sa MV Mika Mari III nga LCT JSC1 diin nitabang kini sa rescue operation ug pagbitad sa maong barko.
Alas 6:09 sa gabii na dihang naabot ang maong barko sa Consuelo Port diin luwas ang tanang sakay niini.
Gitagaan og 24 oras ang kapitan sa maong barko aron pagsumiter sa Marine Protest niini ngadto sa MARINA 7 apan ning pagkutlo ning balita, wala pa kini hingpit nga nakasumiter.
Matod ni Atty. Daniel Martin Oral, ang legal officer sa MARINA 7, nga kon di makasumiter ang kapitan sa maong barko sa Marine Protest, pamultahon kini nila og P5,000.
Lakip sa gipahamtang sa maong barko ang Show Cause Order batok sa Master ug Chief Engineer sa MV Mika Mari III.
Subay usab sa mga insidente sa mga barko sa Jomalia, namahayag si Pascua nga ipaubos sa re-inspection ug shopboard audit ang tanang barko sa maong kompaniya.
Kahinumduman nga nasangad ang susamang barko niadtong Oktubre 27 sa nakalabay nga tuig 200 metros sa Consuelo Port.
Samtang ang MV Mika Mari 8 sa Jomalia, nitakilid sa Consuelo Port niadtong Septiyembre 1, 2019.
Ang MV Mika Mari 6 usab niini natagak ang mga sinako nga bugas mais niadtong Hulyo 15, 2019 sa pantalan sa Danao City. (HBL)