TULO ka mga flyover ang laumang matukod dinhi sa Cagayan de Oro human giaprobahan sa committee sa infrastructure sa bag-o lang nga gipahigayon nga Regional Development Council (RDC)-Northern Mindanao Meeting.
Kini ang gikumpirmar ni Misamis Oriental Governor Bambi Emano sa iyang mensahe atol sa pagpakayab sa nasudnong bandila Lunes, Marso 2, sa Kapitolyo Probinsyal kon diin si Emano ang chairman sa committee on infrastructure sa RDC.
Matud ni Emano nga ang Spanish Government dugay na nga nagtuon unsay kasulbaran sa naghuot nga dagan sa trapiko kaniadto pa nga buhi ug mayor sa dakbayan iyang amahan nga si Dongkoy Emano.
Gani kini sila ang nakadiskubre nga ang moagi sa dalan Gusa ning siyudad moabot og 70,000 ka mga sakyanan matag-adlaw kon hain moabot ngadto sa 40,000 ka sakyanan ang pasulod ug 30,000 ang pagawas sa siyudad.
“Three huge project which were submitted by the Spanish Government for the approval, this was started long time ago paningkamot gyod nga makunhod ang problema sa trapiko sa Cagayan de Oro, ug tulo ka flyover ang usa nga atong giaprobahan sa RDC,” pahibalo ni Emano.
Butangan og flyover gikan sa tindahan sa Robinsons sa Gusa ug didto kini mokonektar sa unahan sa crossing sa galaxy aron nga bisan og adunay traffic light.
“Para ang moliko gikan sa bag-ong diversion dili na kinahanglan moagi og traffic light ug makaliko na anytime. Ang tanan pod sakyanan gikan sa Tagoloan area paingon sa sentro moagi na sa flyover,” matud ni Emano ug miingon nga ang gikan sa Gusa area paingon Tagoloan sa flyover na moagi aron maubsan ang traffic.
Ikaduhang flyover nga butangan mao kining Marcos Bridge kung asa ibutang kini gikan sa Kauswagan paingon sa tunghaan sa Lice aron ang mga sakyanan nga gikan sa maong tunghaan paingon sa Kauswagan molusot lusot na dayon.
Ug katapusang flyover mao kining Bulua flyover nga paingon sa tabok aron ang Rotunda nga bahin niini ang mabakante.