GIBUTYAG ni Mario Napule ang pangulo sa City Traffic Management System CTMS sa dakbayan sa Lapu-Lapu nga dili na mahimong makabalik sa serbisyo ang iyang sakop nga traffic personnel nga nasikop sa gipahigayong buybust operation sa Police Station 3 sa Lapu-Lapu City Police Office LCPO niadtong milabayng Sabado, Pebrero 28.
Ang gitumbok mao si Jannel Llamas Concon alyas Ampog nga taga Purok Super Sunlight, Brgy. Babag, dakbayan sa Lapu-Lapu.
Si Concon kauban ang usa ka Ruel Tampus Ybañez, nakuhaan og moabot sa 14 ka pakete sa gituohang shabu atol sa operasyon sa kapulisan.
Matod ni Napule nga si Concocn niadto lang buwan sa Hulyo sa miaging tuig misulod isip sakop sa CTMS.
Nakadungog na siya sa pagkalambigit niini sa mga binuang apan sumala pa wala lang gayuy lig-ong ebidensya nga magduot kaniya.
Gani dihang gipaubos sa kinalit nga drug test ang mga sakop sa CTMS niadtong miaging tuig nag negatibo man si Concon.
“Naka kuan ko og estorya nga manggamitay pero wala ko ka kahibawo nga namaligya diay na siya, wala na siya maapil sa nag-positive atong gipang drug test ang CTMS medyo idlas bataa,” matod ni Napule.
Samtang giangkon usab ni Napule nga ang laing nadakpan usab sa laing operasyon sa kapulisan niadtong Sabado sa gabie nga si Ricky Ybañez Ycong kanhi usab sakop sa CTMS, dugay nang wala sa serbisyo gumikan kay nag-positibo kini sa ginadiling drugas kaniadto.
Gawas pa niini usa usab kini sa mga personnel nga CTMS nga kusog mangwarta sumala pa ni Napule.
Si Ycong nakuhaan ug moabot sa 7 ka gramos sa gituohang shabu nga mobalor ug P47,600 sa mga sakop usab sa Police Station 3 sa LCPO.
Pahimangno karon ni Napule sa mga personnel sa CTMS sa pagmatngon sa ilang trabaho aron dili mataktak.
“Mao gyud ni akong permi pahimangno nila madakpan, masakpan sa drug test 100 percent wala na gyud sila,” matod ni Napule. (GCM)