UPAT ka mga kawani sa barangay Pajo, dakbayan sa Lapu-Lapu ang nag-positibo sa paggamit og ginadiling drugas atol sa lain na usab nga kinalit nga drug test sa City of Lapu-Lapu Office of Substance Abuse and Prevention C-Losap niadtong Marso 2, 2020, adlawng Lunes.
Matod ni Garry Lao, ang pangulo sa C-Losap, nga sa upat nga nagpositibo usa niini ang babaye.
Sumala pa nga pulos kini contractual nga mga empleyado.
Nunot niini mohimo karon og rekomendasyon si Lao sa kapitan sa Pajo sa posibling pagpaubos unya sa mga nag-positibo sa gidiling drugas sa rehabilitasyon. Apan gitataw ni Lao nga gisultian na siya daan ni Kapitan Lyndel Bullos nga iya gyud taktakon ang upat.
“Walay hold si Mayor, pero magpadala gihapon siya og letter communication ni Kap regarding ani,” matod ni Lao.
Samtang kagahapong adlawa, Marso 3, gipaubos na usab sa kinalit nga drug test ang mokapin sa 200 ka mga sakop sa City Traffic Management System CTMS.
Kini gumikan kay nakadawat og taho si Lapu-Lapu City Mayor Junard “Ahong” Chan nga aduna gayuy mga personnel sa CTMS ang nalambigit sa mga binuang sama sa paggamit sa ginadiling drugas.
Gani niadtong miaging Sabado usa ka kanhi ug usa usab ka kasamtangang personnel sa CTMS ang nasikop sa nagkadaiyang buy bust operation sa kapulisan.
Ang gipangtumbok mao sila si Jannel Llamas Concon ug Ricky Ybañez Ycong.
Matod ni Lao ang duha dugay na nga nadungog sa ilang pagkalambigit sa ilegal nga kalihukan.
Mao kini ang nataktakan ni Ycong kaniadto. Si Concon wala magpositibo sa drug test sa C-Losap sa miagi sanglit usa lang siya ka mamaligyaay nga dili manggamitay.
“Kung di manggamitay, mamaligyaay ra ka dili gyud ka masakpan namo. Ang pulis na nga nag monitor,” matod ni Lao.
Ang gipahigayong drug test sa CTMS maoy ikaduha sa naasoyng buhatan.
Niadtong Septyembre sa miaging tuig, pito ka mga CTMS personnel ang-nag positibo. (GCM)