ABLIHAN sa Land Transportation Franchising and Regulatory Board (LTFRB) 7 karong Biyernes, Marso 6, ang bidding alang sa transport operator nga moserbisyo sa 20 ka mga Interim Bus Service nga mobiyahe gikan sa South Road Properties paingon sa Fuente Osmeña rotunda sugod karong Marso 15.
Ang Interim Bus Augmentation Service mao ang gipasalig ni Department of Transportation Secretary Arthur Tugade base sa kasabutan nila ni Presidential Assistant for the Visayas Secretary Michael Lloyd Dino.
Matod ni LTFRB 7 Regional Director Eduardo Montealto Jr., nga alas 10 sa buntag, magsugod sila og dawat sa bid sa transport operators diin mahuman kini ala 1 sa hapon.
Usa sa gibutyag ni Montealto nga rekisito sa bus, kinahangalan nga aduna kini gitas-on nga 11-13 meters ug seating capacity nga 38-52 ka tawo. Dugang ni Montealto nga posible nga sa Martes na mahibaw-an ang transport operator nga moserbisyo.
Ang IBS mag-terminal sa SM Seaside ug adunay rota paingon sa N. Bacalso, Osmeña Boulevard, ug Fuente Osmeña Rotunda.
Gikan sa SM Seaside biyahion niini ang SRP ug mohunong sa Citi de Mare, motuyok ilawom sa bridge nga nagkonektar sa Cebu City ug Talisay City nga duol sa buhatan sa Department of Public Works and Highways (DPWH) 7.
Mohunong kini sa IL Corso (SRP), dayon motuyok ilawom na usab sa SRP bridge diin moliko paingon sa Mambaling.
Laing hunongan ang Nature’s Spring Mambaling Branch (N. Bacalso), KCC Tire World Corp. (N. Bacalso), Asia Glass Palace (N. Bacalso), ug South Bus Terminal. (HBL)