Nangu sa 'investment scam' nadakpan

NASIKOP sa mga sakop sa Criminal Investigation and Detection Group 7 (CIDG) 7 ang usa ka bayot nga nagpadagan og investment nga negosyo sa Dakbayan sa General Santos human siya malutsi og warrant of arrest.

Ang nasikop mao si John Rafael Revilla, 36, alyas Shantal, lumad nga taga Purok Green Ville, Reyes Compound, Barangay Calumpang, Siyudad sa General Santos.

Ang pagkasikop kaniya pinasikad sa warrant of arrest nga giluwatan ni Judge Renato Tampac sa Regional (RTC) 11th Judicial Region Branch 59 sa dakbayan nga way gitugot nga piyansa sa kasong large scale estafa.

Matod ni Police Major Ronald Allan Tolosa, deputy chief sa CIDG 7, nga nakadawat og impormasyon ang ilang buhatan nga naa ra sa sitio Tikoy, Barangay Bogo, lungsod sa Argao, nagtago.

Dali nga giadto sa mga operatiba ang lugar dala ang warrant of arrest ug dayong pahibawo nga dakpon siya.

Minilyon nailad

Dugang ni Tolosa nga gipasanginlan si Revilla nga mibulsa sa minilyon ka pesos nga gi bubu sa investment nga gitawag nga Shantal Times Four your money scheme.

Tungod sa kadako sa tubo, daghan ang naikag nga mo invest sa pagtuo nga makaginansya silag dako. Kasagaran sa mga biktima taga Mindanao.

Adunay pipila nga taga Sugbo nga nakahatag og di mo menos P300,000 nga hangtod karon wala na mabalik ngadto kanila.

“Accordingly, he is the CEO ani nga company. Ang operation ani is investment ni siya sa foreign exchange. So, ikaw kon investor ka, naa kay kwarta kon mohatag kag kwarta diha sa ilang company. Then ang imong kwarta i-invest sa forex, so in 1 week time ang imong investment mo times four,” matod ni Tolosa base sa sulti ni Revilla.

Giangkon ni Revilla nga aduna siyay negosyo nga investment nga iyang gihulagway nga lihitimo.

Gani sa pagsugod sa investment company sulod sa tulo ka buwan maayo pa ang dagan niini.

Kompleto sila sa mga papeles sama sa Securities and Exchange Commission (SEC), mayor’s permit ug nagbayad usab silag buhis sa Bureau of Internal Revenue (BIR) sa General Santos City.

Gani, panahon nga adunay mobubu og kwarta, aduna siyay ihatag nga resibo nga nakadawat sila sa maong kantidad. (AYB)