DALAGITANG 15-anyos namatay human malabay gikan sa giangkasang motorsiklo ug naligsan sa laing motorsiklo sa dan MJ Cuenco, T. Padilla, Dakbayan sa Sugbo, Martes sa kaadlawon, Marso 2, 2020.
Ang motorsiklo nga giangkasan sa dalagita nadumbol sa ilang gisundang motorsiklo hinungdan sa ilang pagkalabay nga nisangko nga siya naligsan sa laing motorsiklo.
Si Maria Victoria Del Mar patay nang niabot sa Cebu City Medical Center (CCMC) suma sa doktor. Si Del Mar nag-angkas kang John Roy Labestre, 15. Ang duha puro way helmet samtang nagsakay sa motorsiklo suma sa mga saksi.
Si Police Staff Sergeant Roniel Torrefel sa Parian Police Station, imbestigador, niingon nga sa inisyal nga sa imbestigasyon, ilang nasuta nga tulo ka mga motorsiklo ang nalambigit sa panagbangga.
Si Labestre giingong kusog nga nagpadagan samtang nagsunod sa motorsiklong gimaneho ni Ken Padinas, 22, silingan.
Butyag pa ni Padinas nga gikan siya sa Imus Road paingon na unta sa Museo Sugbo dihang nadumbol si Labestre sa lubot sa iyang motorsiklo.
“Didto ra ko nakabalo, Sir, nga natumba na sila ug naligid ang kauban niini nga si Del Mar,” butyag ni Padinas.
Dugang pa ni Padinas nga sa iyang nahinumduman, iya pang nakita nga si Del Mar nakahawid pa kang Labestre.
Apan sa ilang pagkaligid, naligsan si Del Mar ni John Kenan Villaflor, 32, taga Barangay Lahug, Dakbayan sa Sugbo.
Matod ni Villaflor nga siya naningkamot nga di maigo si Del Mar, apan apeke na kaayo.
“Milikay nako ato sir kay nakit-an man nako ang pagtumba sa motor, pero naigo gyud sila sa motor. Ako ani, Sir, naapil ra gyud ko sa disgrasya. Wala gyud to matuyo,”matod ni Villaflor.
Si Villaflor niangkon nga siya nakainom kay iyang birthday sa miaging adlaw.
“Birthday nako gahapon (Lunes), Sir, mao na nga nag-uban mi sa akong barkada ug paingon na unta na ko pauli,” asoy ni Villaflor. Si Labestre gibalhin sa pribadong ospital human sa disgrasya. Kay menor edad, wa siyay lisensya.
Sila si Padinas ug Villaflor kasamtangan nga gi kustodiya sa Parian Police Station sa pagsuwat ning taho alang sa posibleng pagpasaka og kaso.
Ipatawag sa mga pulis ang mga ginikanan ni Labestre nganong gitugtan kining makamaneho og motorsiklo bisan menor pa ug way lisensya.