ANG 21-anyos nga biritera gikan sa University of Mindanao (UM) ang midaug sa labing una nga The Millionaires Pop Icon 2019 sa Success Formula International, Pebrero 23, sa NCCC Mall Buhangin Activity Center.
Si Avegail S. Quiapo, gikan Matina, Davao City mipildi sa lain pang mga partisipante sa pakontest sa SFI nga kabahin sa ilang year-end party, nga naunang naka-iskedyul og Disyembre 2019, apan tungod sa sunod-sunod nga linog gipili nilang isibog kini sa laing petsa.
Makapanindog balahibo lang naman ang performance niya sa kantang “I Will Always Love You” ni Celine Dion.
Si Avegail kasamtangang nagtungha sa UM, nagkuha sa kursong Bachelor of Science in Tourism Management.
Sa pakighinabi sa Superbalita Davao, gibutyag sa dalaga nga luyo sa pagkanta, hilig sab niya ang pag-apil sa pageant ug pagsayaw.
Niya, sa edad nga 13-anyos nagsugod na siya og apil sa mga singing contest, diin ang stepmother niya ang nagtudlo kaniya sa pagkanta.
Sa iyang kahawod sa biritay, angkon sa biritera nga idolo niya sila Sarah Geronimo ug Charice Pempengco.
Di na sab bag-o kang Avegail ang pag-apil sa mga singing competition tungod midaug na sab siya sa Bidabawenyo 2019 isip first-runner up; DavNor Idol 2019 Grand Champion ug siya sab nahimong qualifier sa Your Moment.
Aminado si Avegail nga ang pagsalmot niya sa mga kontest tumong nga siya mokita nga makasustiner sab sa iyang pagtungha.
“Hindi po dahil madami po ang magagaling,” niya dihang gipangutana kung naglaum ba siyang modaug sa The Millionaires Pop Icon 2019.
Usa sa goal karon niya nga makasalmot sa bisan unsang singing contest sa telebisyon sama sa Tawag ng Tanghalan ug The Voice.