SUSMARIOSEP.
Ug tinuod ang akong nadungog, kombati na seguro ni--kombati na para sa lantugi sa 2021 budget.
Ug adto magsugod ang kombati sa Ubos Balay-balaoranan o House of Representatives.
Dunay kasabotan sila si Cong. Alan Peter Cayetano ug si Cong. Lord Velasco nga magbahin sa ilang paglingkod isip Speaker of the House.
Sumala sa kasabotan, 15 ka bulan ka Cayetano ug 21 ka bulan ka Velasco. Kon subayon kini, adto magsugod ang termino ni Velasco sa bulan sa Nobienmbre karong tuiga, nga mao sab ang kasagaran nga pagtak-op sa pagtuki sa budget.
Layo pa man ang Nobiyembre, nganong nagkaguliyang na man?
•••
Sa akong nadungog, dili ang posisyon ang gilantugian.
Ang ilang gilantugian mao ang budget sa 2021. Natipsingan lang ang maong kasabotan. Siyempre, kon kinsa ang namunoan karon maoy mabulahan.
Kinsa man ang angayan magbuot sa budget, si Cayetano nga maoy naglingkod karon o si Velasco nga maoy mo-implementar unya sa gilatid sa budget sa 2021?
Ang tubag – mao nay posibling rason sa lantugi karon.
•••
Natagak si Cong. Isidro Ungab sa Committee on Appropriations. Unsa man kaha ang hinungdan? Duna ba kini kalabotan sa kombati sa budget sa 2021?
Natagak sab si Cong Doy Leachon nga maoy nangulo kaniadto sa House Electoral Truibunal.
Matod pa, kaalyado ni Velasco si Leachon.
Nagpasabot ba kini nga hasta si Ungab, kaalyado sab ni Velasco og mao kini hinungdan nga natagak sab kini sa gihuptan nga usa sa mga gamhanan nga komitiba?
•••
Kutay-kutay ang mga isyo niini. Samtang nagpadayon ang lantugi sa kasabotan nila ni Cayetano ug ni Velasco, padayon sab ang lantugi sa franchise sa ABS-CBN.
Daghan na nga mga resolusyon ang migawas gikan sa mga senador ug mga kongresman nga gusto iuswag ang franchise sa ABS-CBN. Apan hugot ang pagdumili ni Cayetano nga tukion ang maong isyo sanglit matod pa niya, dunay daghan nga mga mas importanteng isyo nga angay tukion og una sama sa COVID.
Bisan pa og pila pa ka libo ka mga resolusyon ang ipagawas sa mga senador, wala kini hinungdan kon dili kini tukion og una sa Ubos Balay balaoranan ni Cayetano.
Kawang lang ang tanan sanglit sumala sa balaod, adto magsugod ang pagtuki sa maong isyo sa Ubos Balay balaoranan.
•••
Unsa man kalig-on ang pamunoan ni Cayetano karon?
Importante kini sanglit anhi magsugod o mawala ang gahom ni Cayetano sanglit ang iyang paglingkod isip Speaker nagsalig sa gidaghanon sa mga kongresista nga mopaubos kaniya.
Sa pagka-karon, makita nga lig-on pa kaayo si Cayetano ug daghan pa sa mga kongresista ang nagsuporta kaniya.
Gani, ang gupo ni Cong. Duke Frasco nga gitawag og Visayas Bloc nga dunay 48 ka miembro mipadayag karong bag-o nga padayon ang ilang suporta ni Cayetano.
Kon magpadayon ang gidaghanon sa mo-suporta ni Cayetano, walay rason nga matangtang kini isip Speaker og walay rason nga matuki ang isyo sa ABS-CBN.
Sanglit kwartahan sab si Velasco, nagtuo ako nga dunay daghan mahitabo karong umaabot nga mga adlaw.
Ang akong gikahadlokan usa ra – dili ba kaha malangan na usab ang pagtuki sa 2021 budget tungod niini?