COTABATO CITY -- Duha ang patay sa mga miyembro sa Bangsamoro Islamic Freedom Fighters (BIFF) sa air to ground assault sa militar alas 4 sa hapon niadtong adlaw nga Lunes, Marso 2, sa probinsiya sa Maguindanao.
Gibutyag ni 601st Brigade Commander Colonel Jose Narciso nga ilang nasiplatan ang grupo ni Kumander Salahudin Hassan nga nagtago sa gamay nila nga kampo utlanan sa Shariff Saydona Mustapha ug Datu Salibo Maguindanao.
Giukoy dayon kini sa mga sundalo og sa diha nga nasiguro ang presensya sa mga terorista giplastar dayon nila ang air to ground assault.
Duha ka fighter jet gikan sa Philippine Air Force (PAF) ang namomba sa posisyon sa BIFF.
Miabag sab ang Field Artillery Battalion Philippine Army ug gipabuto nila ang 105mm Howitzers cannon punting ang BIFF.
Nanibat ang mga rebelde pasulod sa Liguasan Delta sakay sa duha bangkang de motor nga duha ang makina.
Narekober sa mga sundalo ang duha ka patay nga lawas sa BIFF ug nakuha sa ilang posisyon ang usa ka M14 rifle, usa ka improvised caliber .50 barrett sniping rifle, duha ka improvised explosive device ug mga bala.
Sa kasamtangan, nagpadayon ang combat clearing operation sa Joint Task Force Central batok sa BIFF sa Maguindanao. (Edgar Fuerzas)