DAVAO DE ORO -- Way girekomendang piyansa ang korte sa kaso sa tulo ka magsuon nga pulos wanted sa otoridad sa kasong rape. Ang tulo nadakpan sa Purok 2, Barangay Parasanon, Maragusan, alas 9 sa buntag, Dominggo, Marso 1. Giila kining sila Isidro (bansagon gitago), 29-anyos, gikonsiderang top 1 most wanted person, Joey, 31-anyos, top 2 most wanted person ug Ali, 26-anyos, top 3 most wanted person, usa ka minero, parehong molupyo sa Purok 2 Barangay Parasanon, Maragusan. Sa report gikan Davao De Oro Provincial Police Office, mga personahe sa Maragusan MPS uban sa Tigbao MPS kaabag ang laing yunit mipahigayon og manhunt operation sa dapit nga miresulta sa pagkasikop sa tulo. Ang pagdakop sa magsuon subay sa warrant of arrest nga giisyu ni Judge Romeo T. Descalar sa 9th Judicial Region, Regional Trial Court Branch 19, Pagadian City. Kini nanukad sa upat ka ihap sa kasong rape nga nakapetsa Hulyo 27, 2009, Enero 15, 2009 ug Enero 15, 2009. Ang mga suspek gikustodiya sa Tigbao MPS sa Pagadian City ug nagpaabot sa sunod nga mando sa korte labot sa ilang kaso.