GIATAKE sa gihambin nga balatian ug nakabsan sa kinabuhi ang amahan sa traffic enforcer nga gipatay samtang gipahigayon ang road clearing operation sa Puerto, siyudad sa Cagayan de Oro.
Gituohang naguol og maayo si Amado Langam, 61, sa pagkamatay sa iyang anak nga si Mark Langam, 26, sakop sa Roads and Traffic Administration (RTA).
Gikatakda nga idungan na lang og lubong ang amahan ug anak.
Gihatagan og usa ka semana sa director sa Police Regional Office (PRO)-Northern Mindanao ang Cagayan de Oro Police Office (Cocpo) sa pag-aresto sa responsable pagpusil patay kang Mark.
Gibutyag ni Police Major Evan Viñas, tigpamaba sa Cocpo, nga naghatag si Police Brigadier General Rolando Anduyan, PRO-Northern Mindanao director, og usa ka semana aron pagsikop sa responsable sa pagpatay.
"As per info, a span of a week po," matud ni Viñas.
Gidugang pa nga buot usab sa Cocpo nga magtukod og task force nga makatutok sa kaso ug mas mapadali ang pagsikop sa responsable.
"One of the agenda po, hoping it will be realized," dugang ni Viñas.
Gibutyag usab ni Police Colonel Henry Dampal nga nakigkoordinar na sa ubang ahensiya aron nga mas mapadali kining maong pagsulbad sa kaso.
Nasayran nga naghatag og ganti nga tunga sa milyon ang lokal ngakagamhanan sa siyudad ug gani gisugyot nga madugangan pa kini aron nga mahatagan og hustisya ang kamatayon sa biktima.
Gihatag usab sa konseho sa siyudad ang ilang representation allowance and transportation allowance.