GANDARA, Samar – Opisyal sa lokal nga kagamhanan sa ning lungsod gipusil patay sa wa mailhing mga killer pasado alas 7 sa buntag, Martes, Marso 3, 2020.
Giila ang biktima nga si Alvin Estrelles, 47, pangu sa Municipal Disaster Risk Reduction and Management Office (MDRRMO), nagpuyo sa Barangay Adela ning lungsod.
Base sa imbestigasyon sa kapulisan, si Estrellas sakay sa iyang motorsiklo padung mopauli sa ilahang dapit.
Pag-abot sa lugar nga sakop sa ilang barangay, usa ka puti nga Mitsubishi Adventure nga way plate number niabot.
Ang sakay niini namusil sa biktima gamit ang wa matino nga kalibre sa armas.
Naigo sa nagkadaiyang parte sa lawas si Estrellas nga niresulta sa iyang hinanali nga kamatayon. Dali nga nisibat sa wa mahibaw-i nga direksyon ang mga killer nga wa pa mailhi sa kapulisan.
Matod sa kapulisan nga ila pa usab sayron ang motibo sa krimen, kon wa ba siyay kaaway.
Samtang sa Maasin, Southern Leyte, patay ang usa ka negusyante human gipusil sa mga tulisan duol sa iyang pinuy-anan.
Kini nahitabo gawas sa FJJ Building, Purok Kulo, Barangay Abgao alas 8:30 sa gabie, Martes, Marso 3. Giila ang biktima nga si Proebel Flores, 48, dunay negusyo nga crispy chicken sa dakbayan.
Base sa imbestigasyon, padung na unta mosud sa iyang giabangan nga apartment si Flores sa dihang niabot ang duha ka mga tulisan sakay sa usa ka motorsiklo ug sa way duha duha, gipusil ang biktima.
Si Flores nakaangkon og mga samad pinusilan sa ulo nga niresulta sa iyang kamatayon.
Gidala sa usa sa duha ka mga tulisan ang gisakyan niini nga Mio Soul 125 nga may plakang for registration, ug color pink. Nadala usab ang salapi sud sa U-box sa motorsiklo nga nagkantidad og P50,000.
Base sa dugang imbestigasyon, human sa insidente, ang mga tuilisan niagi sa bukirang bahin sa Barangay Rizal ug nigawas sa Sitio Tuburan, Barangay Tunga-Tunga ning dakbayan.
Nakuhaan pa og footage sa closed circuit television camera (CCTV) ang unang motorsiklo nga gigamit. Nagtuo ang kapulisan nga di mga taga Maasin ang mga killer.