KAPIN sa napulo ka tawo mireklamo sa Criminal Investigation and Detection Group (CIDG) 7 nga giingong nabiktima sa investment scam nga gipadagan sa ila ra usab nga higala.
Mga reklamante nagtuo nga ang kwarta gi-invest ngadto sa laing investment scheme sama sa Kapa ug Organico.
Ang mga nabiktima nisaysay nga mibubo sila og dakong puhonan sa United Treasure Credit Corporation sa Riverdale Subdivision, nahimutang sa barangay Pit-os, siyudad sa Sugbo nga matod pa gipadagan ni Clarissa Toledo.
Kasagaran kanila nag-invest og kapin sa P100,000 diin sa matag unom ka buwan adunay incentives nga ilang madawat sulod na sa tulo ka tuig.
Niadtong Enero lang wala na silay nadawat ug dili na usab sila pa-utangon sa kwarta nga ilang gi puhunan sa rason nga aduna nay naka-una og huwam sa kwarta. Apan sa dihang ilang gipangutana kon asa na ang ilang puhunan, daghan matod pa og rason ang tagdumala ug dili na makontak.
Tungod niini ilang gipadangat ngadto sa kapulisan ang ilang reklamo ug andam nga mo pasaka og kaso ang mga nabiktima ngadto sa korte.
Usa sa nabiktima nga gitago sa pangalang Joan, taga - Barangay Tisa sa dakbayan sa Sugbo naka-invest og P380,000 ang na-anugnan sa iyang gipuhunan.
Misalig matod pa sa nagdumala sa kompanya kay ila ra sab kining higala apan wala sila magtuo nga unayon sila og biktima niini. Gani tungod sa iyang pagsalig mi-apil na ang iyang mga anak nga pulos aduna nay trabaho sa pag invest sa credit company ni Toledo.
Sa unang mga tuig maayo pa ang dagan sa iyang negosyo tungod kay kon adunay mohuwam sa kwarta aduna kini interest nga 10 percent nga mao usab ang ilang bahinon sa matag unom ka buwan.
Nagduda siya nga ang ilang kuwarta nga gibana-bana nga moabot dul-an P3 milyones ang gigamit sa pag-invest ngadto sa Kapa ug Organico.
Gumikan kay human masira ang maong investment company ug nasuta nga scam kini didto na nagsugod ang dili maayong dagan sa United Treasure Credit Corporation.
Mipasalig matod pa si Toledo nga mobayad apan dili na matawgan sa iyang mobile phone.
Usa sa mga reklamante ang mihatag sa contact number sa Superbalita Cebu aron makuhaan sa iyang habig si Toledo apan dili na kini matawgan.
Si Police Major Ronald Allan Tolosa ang deputy chief sa CIDG-7 nagkanayon nga ang ilang buhatan mohimog imbestigasyon kalabot sa maong reklamo.