ATONG ipadayon ang suhito nga atong giputol niadtong nakalabay nga semana nga gipasa sa kagamhanang Paganao gikan kang Emperador Constantine ngadto sa Pope o ang Papa, pangulo sa simbahang Romano Katoliko.
Akong balikon nga ang ika-upat nga mananap nga nakita sa panan-awon ni John the Revelator sa Pinadayag naga representar sa kagamhanan sa Roma, usa ka emperyo nga gihatagan og higayon nga magbuot o mogahum sa tibuok kalibutan.
Sa mga miagi sa pagtuon sa World History sa eskwelahan, atong natun-an nga ang Roma mikupot og gahom ug daghang mga panghitabo sa kasaysayan sa kalibutan ubos sa mao nga panahon.
Sa Google, atong mabasa ang mga nahitabo panahon sa Dark Ages sa kalibutan diin ubos sa pagdumala ni Constatine the Great, Licinius ug sa emperyo sa Roma, diin ilang gi-legal ang Kristiyanismo nga relihiyon, liboan ang gipamatay kon dili mosunod sa mando sa estado sa pagsunod sa Kristiyanismo nga gidumala sa Roma.
Gihulagway ni Juan Revelador ang ika-upat nga mananap nga mapintas ug mosibo o haum ang iyang paghulagway sa kasaysayan sa kalibutan panahon sa pagdumala sa Roma.
Atong masabot nga ang mananap nga mapintas dili usa ka tawo apan usa ka reliheyoso ug politikanhon nga sistema sumala sa Pinadayag 13. Sa Daniel 7:25, nagsulti nga ubos sa maong kapanahonan ang nagadumala mosulti sa dagkong mga pulong batok sa Halangdon Uyamut, ug magapaluya sa mga balaan sa Halangdon Uyamut ug siya magahunahuna sa pag-usab sa mga panahon ug sa Kasugoan... Maila kining gahom pinaagi sa mga mosunod.
Una, usa kini ka otoridad nga gihatagan og gahum gikan sa Pagano nga Roma. Kinsa ang mihatag? si Emperorador Constatine the Great. Iyang gihimo ang Constantinople nga bag-ong capital sa Rome ug gihakot ang mga katoliko nga pamilya sa maong dapit ug ang mga relics sa mga martir nga Kristiyano sa maong simbahan.
Iya sab gihatag ang iyang korona kang Sylvester sa wala pa siya namatay. Ang Catholicism nahimong relihiyon ug nagmando sa tibuok kalibutan. Ubos sa pagdumala sa mga pari, ilang giangkon nga sila ang puli sa Diyos dinhi sa yuta.
Ikaduha, usa kini ka reliheyoso nga kagamhanan nga dunay gahom sa tibuok kalibutan. Ubos sa Papal supremacy, duha ka gahom ang gigunitan sa mga Papa niining panahona, isip pangulo sa simbahan ug pangulo sa gobyerno.
"Siya magasulti og dagkong mga pulong batok sa Halangdon Uyamut." Gitudlo sa simbahan nga ang Pope maoy puli sa Diyos dinhi sa yuta. Ang mga Pari makahimo sa pagpasaylo sa mga sala sa katawhan nga unta Diyos lang ang makahatag pasaylo sa makasasala.
Nakapasipala ba ang pag-angkon sa Pope nga puli siya sa Diyos ug sama sa Diyos ang iyang kahimtang? Dihang si Hesus gipaatubang sa hukmanan ni Ponso Pilato ang mga Hudiyo mitubag nga nag-ingon, tungod sa mga maayong binuhatan dili ka namo batuhon apan tungod sa pagpasipala kay ikaw nga usa ka tawo naghimo sa imong kaugalingon nga Diyos.
Juan 10:33. Ang pag-angkon gihimo sab sa Pope sumala sa Encyclical Letters of Leo XIII nga nagkanayon, "We hold upon this earth the place of God Almighty." Sa basahon nga Dignity and Dities of the Priest Vol.12, p2 nagkanayon, "God himself is obliged to abide by the judgement of his priest, and either not to pardon or to pardon, according as they refuse or give absolution... The sentence of the priest precedes, and God subscribe to it."
Sa ika-upat, usa kini ka malutoson nga gahum diin sa ikalima, magagahom sulod sa 1,260 ka tuig, sumala sa Pinadayag 13.. Ang paggahom sa mga Pope nagsugod sa 538 AD ug natapus sa 1798 AD dihang gidakop ni General Bertier ug gi exile ang papa didto sa Valence.
Sa Church History, p. 24 nagkanayon; "The murder of a Frenchman in Rome in 1798 gave the French an excuse for occupying the Eternal City and putting an end to the Papal temporal power."
Sa ika-unom, magagahom siya sulod sa 1260 ka mga tuig. Nagkalawom ang atong paghisgot ug mohatud kanato sa numero nga 666, kinsa ang mohatag sa numero ug unsay kalabutan sa Pope niini? Ato napod sumpayan sa sunod.