INGON sa naisahan o naunhan ni anhing self-confessed drug lord Franz Sabalones ang kagamhanan sa pagkuha sa gituohang minilyon ka pesos nga naa sa iyang bank accounts sa mga banko sa Sugbo.
Pila ray nahabilin? Moabot na lang sa P10,000 ang naa sa tulo ka bank accounts ni Sabalones, matod sa opisyal sa Philippine Drug Enforcement Agency (PDEA) 7.
Matod ni PDEA 7 Deputy Director Thessa Albano-Tiuzen nga usa sa iyang bank account aduna lamay P2,000 nga deposito samtang sa laing bangko adunay P7,000.
Ang ikatulong account duna lay sulod nga P1,000.
Nagtuo hinuon kini nga posibling sa wa pa nimando ang korte sa pagpugong sa iyang bank accounts, hayan dunay nakapahibawo ug na-withdraw ang kwarta.
Hinuon, intact pa ang kapin sa P350 million nga balor sa mga kabtangan ni Sabalones.
“Siguro, Sir, kay nigawas ang order 2017 na baya, ang preservation order,” matod ni Tiuzen sa mga tigbalita.
Nagduda ang PDEA 7 nga gawas sa tulo ka bank accounts ni Sabalones, aduna pa kini lain nga wa pa nila masayri.
Sila makig-alayon pagbalik sa Anti Money Laundering Council (AMLC) alang sa pagsubay sa bank records ug mga kabanay nga mahimong dummy.
Mga kabtangan
Adunay walo ka real properties si Sabalones nga pulos nakapangalan kaniya nga hangtod karon padayon pa nga gidungog sa korte ang civil forfeiture nga kaso.
Dugang ni Tiuzen nga nagpaabot pa sila sa himuon nga pre-trial nga giingong hapit na magsugod.
Ang AMLC nipasaka usab og 98 ka ihap sa kasong criminal ngadto sa korte labot sa money laundering ug gipaabot ang resolution gikan sa piskaliya.
Sukad niadtong 2017, wa pa makalihok ang kaso.
Sa pangutana nganong dugay ang paglihok sa kaso, matod ni Tiuzen nga “depende man gud na sa court, sa court proceedings.”
Hugot nga nihimakak ang pamilya niini nga ila ang mga kabtangan nga naa sa court order.
Bisan sa kadugay na sa kaso, gibantayan sa PDEA-7 ang maong mga kabtangan ni Sabalones pinaagi sa abag sa mga barangay officials kon diin kini nahimutang.
Kon mamatud-an nga ang maong mga kabtangan napalit ni Sabalones sa kita niini sa illegal nga drugas, mapunta kini ngadto sa national treasury.
Giklaro hinuon niya nga bisan namatay na ang nakapangalan, di kini makaapekto sa kaso nga nagpadayon pa karon sa korte.
Niadtong Abril 2019, gipatay sa wa pa mailhing mamumuno si Sabalones samtang mitambong sa billiard tournament sa Mother Ignacia street, Quezon City.
Si Sabalones nagtakuban nga pastor sa Seventh day Adventist church, apan natingala ang mga tawo sa maong bilyaran nga magpa party panahon nga moduwa.