NAKASULOD sa finals ang Cebu teams Southwestern University (SWU)-Phinma Cobras ug University of the Visayas (UV) Green Lancers human nila gipanglampornas ang nag-una nilang duha ka mga kontra sa Philippine Collegiate Champions’ League (PCCL) Vis-Min Regional Tournament sa Lamberto Macias Sports and Cultural Center sa Dumaguete City.
Ang mokampiyon ning maoy kompetisyon makabaton og luna sa Final Four alang sa PCCL National Collegiate Championship.
Sa presstime, padayon pang nagkombati ang Cobras ug Green Lancers sa finals kagabii.
Ang Cobras, nga maoy kasamtangang kampiyon sa Cebu Schools Athletic Foundation Inc. (CESAFI), ningmakmak sa Asian College – Dumaguete, 74-47, ug Holy Trinity College, 97-79, sa ilang mga tahas sa elimination round,
Samtang ang Green Lancers ningkastigo sab sa Asian College, 89-69, ug HTC, 97-79, aron pag-abante sa finals.
Ang mingdaog tali sa Cobras ug Green Lancers kagabii mao ang makigparang sa kasamtangang UAAP champions Ateneo de Manila University (AdMU) Blue Eagles sa semi-finals sa National Championship nga ipahigayon karong Marso 7 sa Ynares Sports Arena sa Manila.
Sa laing kombat sa semi-finals, magparang ang University of the Philippines (UP) Fighting Maroons batok San Beda Red Lions. (JNP, ESL)