GIPUKAN sa University of the Visayas (UV) Green Lancers ang Southwestern University (SWU) Cobras, 76-67, sa ilang championship game sa Philippine Collegiate Champions’ League (PCCL) Vis-Min Regional Tournament nga gipahigayon Miyerkules, Marso 4, sa Lamberto Macias Sports and Cultural Center sa Dumaguete City.
Sa kadaugan, sa makausa pa, ang Lancers mao na usab ang mo-representar sa Visayas sa Final Four alang sa PCCL National Collegiate Championship nga ipahigayon didto sa Ynares Coliseum sa Kaulohan. Gikatakda ang Lancers nga molarga ugmang adlawa paingon sa Manila.
“Siguro determinado kaayo ang mga bata nga modaog gyud sila. Ila siguro ning regalo sa birthday nako,” matod ni Lancers coach Gary Cortes kinsa magsaulog sa iyang adlawng natawhan ugma, Huwebes, Marso 5.
Unang nakaarangkada ang Cobras sa first quarter apan nakuha sa Lancers ang labaw sa pagkapupos sa first half.
“Naka-adjust mi sa among depensa sa second quarter. Didto nami nakalabaw. Nalimitahan namo ang ilang (Cobras) opensa,” dugang ni Cortes sa dihang nahinabi sa Superbalita.
Matod ni Cortes nga nakabingat sila og labaw ngadto sa 13 puntos sa third quarter.
Hinuon, dihay higayon nga nakapahagsa og rally ang Cobras ni coach Mike Reyes nga nakapahak sa ilang bintaha ngadto sa singko puntos na lang.
Apan sa panaghugpong og balik sa depensa sa Lancers, ilang nainat ug naprotektahan ang labaw hangtod na sa katapusang buzzer sa duwa.
Ang panaghugpong sa iyang mga beterano nga sila si Gileant Delator, Jancork Cabahug, Michael Maestre ug Ted Saga maoy nahimong mahait nga hinagiban aron malangkat ang kadaugan. (JBM)