25 traffic enforcers taktakon
ADUNAY 25 ka mga personnel sa City Traffic Management System (CTMS) sa dakbayan sa Lapu-Lapu ang hayan mataktak sa ilang serbisyo isip mga traffic enforcer.
Gipahibawo ni Lapu-Lapu City Mayor Junard “Ahong” Chan nga ang maong mga personnel gisuspetsahan nga nalambigit sa ilegal nga kalihukan ilabi na sa ilegal nga drugas.
Matod ni Chan nga sa 25 ka mga personnel 22 niini kansang mga pangalan milutaw sa listahan sa kapulisan nga posibleng gidudahan nga nalambigit sa maong illegal nga binuhatan.
Posibleng adunay namaligya ug posible usab nga adunay migamit niining 22 ka mga kawani sa CTIMS base sa listahan sa kapulisan.
Nagkanayon ang mayor nga sagol ang maong mga personnel adunay taod-taod na ug aduna say mga bag-ong na-hire.
Atol sa kinalit nga drug test adunay duha ka mga personnel ang wa makatunga kay naatol nga ilang day-off.
Gipahimangnoan ni Chan kadtong anaa sa lista sa kapulisan sa pagluwat na lang sa katungdanan samtang wala pa niya kini hingpit nga gitaktak gumikan kay sayod siya nga aduna gayuy basehanan ang kapulisan sa paglista kanila sa ilang mga pangalan.
Niadtong miaging Sabado usa ka CTMS personnel ug laing kanhi kawani ang nasikop sa buybust operation sa kapulisan nga maoy nakapa-aghat sa kagamhanan sa pagpa-ubos na usab sa mga CTMS personnel sa laing drug test human sa unom ka buwan.
Nunot sa nag ung-ong nga pagtaktak sa 25 ka mga personnel sa CTMS nangita karon ang kagamhanan ug moabot sa 30 ka mga aplikante nga maoy mohulip kanila..
Bisag kinsa nga Oponganon mahimong maka apply sumala pa ni Chan basta makapasar lang sa qualification.
Ang mga qualification mao nga kinahanglan nakatongtong ug 2nd year college o senior high school, kinahanglan 5’5” ang height sa mga lake ug 5’2” sa mga babaye ug nag edad ug 21 ngadto sa 45-anyos ug walay criminal record.
Giklaro ni Chan nga walay bulok politika ang ilang dawaton basta makapasar lang sa interview ug training nga ipahigayon.
Sobra usab sa P404 ang adlaw ang dawaton nga sweldo nga mao sumala pa ang gidawat sa mga personnel sa CTMS kaniadto.
Wala ka oras usab ang duty ug dunay bayad kung adunay overtime.
“Wala sila kinahanglana nga duna ba silay backer basta ang importante nga quality sila motrabaho,” matod ni Chan. (GCM)