SA TUYO nga kahatagan og solusyon ang krisis sa turismo sa Sugbo gilaraw sa lalawigan ug stakeholders ang paghatag og discounts alang sa mga kustomer sa mga malls, hotels, resorts ug restaurants.
Buot ni Cebu governor Gwendolyn Garcia nga mas hatagan og pagtagad ang turismo sa lalawigan sa Sugbo nga ilabing na apektohan sa padayon nga pagkatap sa coronavirus disease (COVID-19) sa nagkadaiyang nasud.
Atol sa gipahigayong pakigpulong sa tourism stakeholders sa lalawigan niadtong Marso 4, gipasabot ni Garcia nga tungod sa COVID-19 nag padayon ang pagkunhod sa gidaghanon sa mga turista nga mo-duaw sa Sugbo.
Gibutyag ni Shalimar Tamano ang Regional Director sa Department of Tourism (DOT) 7 nga nagpadayon ang pagkunhod sa mga turista sa tourist destination sa Sugbo ilabi na ang lungsod sa Oslob.
Gikan sa 1,500 ngadto sa 2, 000 ka mga turista ang moduaw matag adlaw sa lugar alang sa whaleshark watching, karon miubos na kini sa 800 ka mga turista.
Samtang sa nahipos nga datos sa National Economic and Development Authority (NEDA) 7, lugi og gibana-bana nga $40,395,430 sa matag buwan nga kita sa turismo ang Central Visayas tungod sa Covid-19.
Lakip sa labing apektado mao ang mga hotels, restaurants ug resorts.
Matod pa ni Garcia nga inay magpaabot sa pagdagsa og balik sa mga international tourist angayang hatagan ang mga Sugboanon og kahigayonan nga mosuroy og mo-avail sa maong discounts.
Sa niining paagi, makapadayon gihapon sa pag operate ang mga negosyo og dili kini mahutdan og kustomers.
“In the meantime let’s do what we can in our level and kon sa una magsige ta og dala sa mga turista gikan sa gawas padulong sa ubang mga lungsod this time let us encourage those that are coming from the towns to come to Cebu,” pamahayag sa opisyal.
Ang pangulo sa League of Municipalities of Philippines (LMP), Liloan Mayor Christina Frasco ang mopahibawo sab sa mga mayor sa kalungsoran aron nga mahatagan og kahigayonan nga makasuroy ang mga Sugboanon sa kalungsoran pinaagi sa paghatag og libre nga masakyan.
Apan gibate og kabalaka ang mga stakeholder nga kon magsige sila og hatag sa discounts mogamay ang ilang kita ug sa posibilidad nga mosaka ang bayrunon sa kuryente ug tubig og dili na unya kini maka-ato sa pag bayad.
“The government is needed and they needed to give a moratorium like for example if the mall will give you all the discounts in the world but Veco, our electric bill is soaring up, up, up how do you think we can manage that or if you want to have discounts. MCWD is charging so much every year and every month so how can we solve this?” sumala pa sa usa ka business representative nga mitambong sa maong meeting.
Bisan pa man, mipadayag hinuon ang mga stakeholder og supporta sa maong pamaagi.
Laing hugna sa pakigpulong ang ipahigayon sa kapitolyo alang sa final nga desisyon sa mga stakeholders.
Gidapit usab ni Garcia ang tanan nga utility companies nga mosalmot sa maong pulong alang sa maong hisgutanan. (ANV)